Desiree Thode-Helder di Directie Ouderenzaken:
ORANJESTAD (AAN): Directie Ouderenzaken ta reuni regularmante cu casnan di cuido, tanto esnan priva como Saba pa mantene comunicacion di ambos banda. Ya for di aña 2024, Directie Ouderenzaken a notifica e casnan di cuido cu lo introduci exigencianan nobo di calidad di cuido. Na final di 2025, e implementacion di e exigencianan aki a keda aproba den Conseho di Ministro.
Señora Desiree Thodé-Helder, Directora di Directie Ouderenzaken, a duna di conoce cu lo implementa e maneho aki den tres fase. Lo midi e situacion actual (nulmeting) pa haya miho bista con esaki ta na e casnan di cuido y a base di esaki lo introduci e exigencianan nobo y mara esaki na e permit cu nan ta haya.
El a enfatisa cu e maneho di Directie Ouderenzaken ta pa mehora calidad di cuido di adultonan mayor no solamente na cas pero tambe na e casnan di cuido. “Casnan di cuido semper ta duna di nan banda pa duna cuido adecua pero hopi biaha nan no tin e hermentnan y personal adecua”, señora Thode-Helder a duna di conoce den un entrevista recien cu DIARIO.
E maneho pa introduci exigencianan no ta solamente pa mehora e calidad di cuido pero pa duna sosten pa brinda esaki na un manera apropia, teniendo na cuenta cu e necesidadnan di cada persona y tambe e facilidadnan necesario. Esaki ta inclui e luga, cuminda, cama, baño entre otro.
Segun señora Thodé-Helder, actualmente tin 18 localidad di cas di cuido teniendo na cuenta tambe esnan priva. “Awo ta bay cuminsa e restructuracion di e casnan di cuido a base di implementacion di e exigencianan di calidad pasobra no ta tur cas di cuido tin e facilidad y personal adecua pa duna e cuido hopi compleho. Den e casonan aki, nan lo haya e cuido menos compleho y e casnan cu ta cumpli cu e exigencianan aki, lo haya e casonan cu ta exigi cuido hopi compleho. Y esaki ta keda mara den e permiso cu nan ta haya”, señora Thodé-Helder a expresa.
