Prome cu Covid-19 ya hende tabata busca su mes den cambio mundial - *Popularidad politico a resulta destructivo pa e esencia di democracia - *Definicion di goberna ta cu mester duna guia corecto pa moral sano
ORANJESTAD (AAN) — Nos no por dera nos cabez den santo. Covid-19 ta un problema, mescos cu e aumento di prijs di petroleo y aumento di motibo pa preocupacion, cansancio y un sentido di inseguridad.
Actualmente hende ta huy pa su mes. Hende ta huy pa su realidad. Hende ta huy pa un futuro, cu cada rato ta parce di ta perde mas motibo pa hende biba cu cualkier speransa.
Nunca hende tabata tanto den comunicacion cu otro, manera na e momentonan aki. Nunca hende tabata mas aleha di otro, manera na e momentonan aki.
E ponencia aki ta parce contradictorio, pero ta e gran berdad cu ta bini dilanti ora investiga comportacion di hende y e razon pa cual hende ta haci loke e ta haci.
Hende ta bay drumi cu telefon y ta lanta cu telefon, cu ta transmiti un mensahe tras di otro den un mundo cu hende hopi bez ta inventa.
Portret pa Facebook, app, message y asina por sigui. Pero hende ta evita di bay den profundidad.
Covid-19 a paralisa mundo y a paralisa hende na careda den un mundo cu ta soluciona tur tipo di problema pero aparentemente no por soluciona e problema di hende.
E hecho cu uzo di droga y alcohol a bira un problema na mundo, ta acentua cu algo tabata pasa cu hende.
Gobiernonan rond mundo mester a bolbe na e realidad di gobernacion, cu no ta nifica hunga popular cu hende cu mester duna voto na momento di eleccion.
E pandemia a exigi pa Gobiernonan bira Gobierno y bisa Pueblo kico mester pasa na interes di cada hende pero tambe di henter comunidad.
Liderazgo den gobernacion mester a bolbe, hasta enforsa pa Polis y ehercito si tabata necesario.
Covid-19 a hiba gobernacion na e base di democracia, cu tabata nifica cu e bienestar di hende ta central den gobernacion.
Covid-19 a aumenta stress, ansiedad, miedo pa muri, confusion dor di falta di seguridad riba tereno di salud, cu a uni na e falta di seguridad financiero cu entre otro Aruba a conoce despues di 2010 ora Aruba no a enfrenta e resultadonan di e crisis provoca pa e recesion mundial, manera mester tabata.
Gobernacion tabata tin problema pa splica hende cu tin un momento cu placa ta bira menos, pero tin otro balornan den bida.
Awe liderazgo y gobernacion rond mundo mester bolbe na nan base.
Liderazgo ta nifica cu ta duna hende guia pa felicidad humano y di comunidad cu no ta depende di cuanto rato hende por sigui baila pero di trankilidad humano y e sentido di paz cu hende mes.
Popularidad politico a destrui e esencia di democracia. Hende no mester di un mundo di fantasia pero direccion y maneho pa e por uza loke e tin, na forma corecto y responsabel pa su bienestar.
Gobernacion mester tin moral sano como su punto di salida pa democracia mester defende loke ta bon y bay contra loke ta malo, pa tin husticia manera bukinan di Ley pero tambe e esencia di e ser humano ta exigi.
Pa resumi, esaki ta e “normal nobo”. Hende y comunidad ta stop di sconde su mes tras di mundo di fantasia, di goso inventa cu ni sikiera hende tin placa pa paga den hopi caso.
Aruba mester bolbe na e realidad di Aruba cu mester dicidi con grandi e comunidad por ta pa tur hende por haya trabou, pero tambe espacio pa recrea, pa e caracter nacional di Aruba y habri porta pa futuro na un forma cu Aruba por paga.
Di e forma ta yega na un pais, caminda e Arubiano ta sinti su mes na cas.
Asina e ser humano por sinti su mes trankil sin sconde pa su mes, y hunto por enfrenta retonan manera loke Covid-19 a produci y ainda lo produci si liderazgo permiti libertinahe.
Democracia ta nifica “Gobernacion di Pueblo” y asina ta duna prueba cu comunidad mester di liderazgo firme cu ta duna hende guia y herment sano riba e caminda pa felicidad.
