*A sali na fabor di Secrets Baby Beach Resorts Aruba
*Awo tin nada pa impedi pa su construccion continua
ORANJESTAD (AAN) – E lider di Plataforma Nos Pais, señor Otmar Oduber, ta sumamente contento cu e veredicto di Huez, cu a sali na fabor di Secrets Baby Beach Resorts Aruba.
E lider politico a duna e siguiente declaracion: “Naturalmente, ayera den Corte e ta confirma personalmente lo mas bunita di dje. E ta confirma tur e proceso di tuma di decisionnan cu tabata tin for di cuminzamento; kiermen, otorgamento di tereno cu tabata caminda mi tabata tey, como minister, pa otorga esakinan.
E permisonan cu a wordo inicia pa loke ta trata e construccion bao di mi periodo tambe, cu a cana su caminda atravez di DOW y diferente comision, cu tres Huez den e caso aki, a caba cu e discusion cu tabata tin di un par di bisiña cu, cu hopi egoismo, no a wak e trabao grandi cu pa decadanan a wordo haci pa San Nicolas haya su prome hotel. P’e tambe haya un oportunidad, den loke ta e pilar economico di Aruba.
Nan no a goza di esaki, nan a goza di petroleo tempo cu tabata tin refineria, pero aworaki nan ta bay goza di e bolo cu henter Aruba ta goza di dje: e sector turistico”, Otmar Oduber a señala.
E lider politico a agrega cu e veredicto aki ta elimina tur posibilidad cu tin impedimentonan mas, pa impedi cu e hotel aki wordo termina. El a bisa cu na September otro aña e hotel ta habri su portanan, y e tin entendi cu ya caba a cuminza cu adkisicion di hende.
“Hopi hende cu mi ta topa di San Nicolas ta bisa mi cu, definitivamente, nan kier bay traha mas cerca di cas. E economia di San Nicolas, comunidad di Aruba, pueblo di Aruba, ainda nan no ta percibi kico ta biniendo pa nan. E hotel aki, nos ta mir’e, nos ta discutie, nos a pleita siman pasa cu si un grupo ta bringa cu un par di turista siendo cu tur e cosnan ey ta regla pa ley; tin ‘beach policy’ cu ta regla précis henter stroke di awa, te caminda cu no mag tin ningun palapa, e mester keda habri pa tur hende”, Otmar Oduber a señala.
