Pa Semana Santa lo tin 3 ambulance disponible:
ORANJESTAD (AAN) – Den entrevista cu Hefe di Servicio di Ambulance, señor Liberato Hoek, el a papia tocante e temporada aki di Semana Santa, unda cu normalmente, semper tin ambulance disponible pa na momento cu ta necesario.
Hoek a informa cu e aña aki tambe lo tin tres ambulance na cada warda. En principio nada a cambia riba esaki, pero locual si Hoek ta remarca ta pa hendenan tene cuenta cu no tin ambulance riba beach.
“Tur nos ambulancenan ta bay ta den e postnan di custumber, pero na momento cu por presenta un situacion di emergencia, por yama 9-1-1- y esaki lo despacha un ambulance pa duna e servicio”, Liberato Hoek a bisa.
El a agrega cu den e caso aki, ta importante pa splica e centralista kico ta pasando, pa asina e por guia den e proceso de cuido akinan. Nan por bisa e persona kico pa haci mientras cu e ambulance ta na caminda.
Importante ta tambe pa un persona relaciona cu e caso, para pafo riba e caminda, pasobra ambulance no por para dilanti e tent si no duna un señal na unda mester ta.
Liberato a splica cu e area por ta grandi, manera Baby Beach cu ta hopi amplio. E ambulance ta yega pero mester specifica na unda précis nan mester ta. Si tin polis den vecindario, esaki lo por yuda ambulance.
Otro aspecto cu Liberato Hoek a menciona, ta pa e personanan cu tin malesa cronico ta importante pa nan tuma nan medicamento. “Locual nos a ripara for di carnaval ta cu nan ta prefera di no tuma medicamento, pa motibo cu nan kier bebe alcohol, pero esaki por tin su consecuencianan. Pues, banda di esey nos sa cu nan ta bay ta den solo practicamente henter dia. Pues, zorg pa bebe suficiente likido, pa no deshidrata. Esaki vooral ta conta pa muchanan cu hopi biaha ta bay ta den awa, den solo. Banda di esey ta importante pa tene bon bista riba muchanan chikito. Si ta laga nan bay landa, zorg pa nan tin un vest bisti pa evita casonan lamentable por pasa”, Liberato Hoek a subraya.
Hoek a señala cu den dos siman di tempo, tabata tin cuater caso di hogamento y, lamentablemente, dos di nan a fayece, e otronan dos e ta compronde, nan resultado ta mas positivo.
Liberato ta adverti cu aworaki tin hopi biento y lama ta hopi mas bruto cu normal, pues e hendenan mester ta hopi mas cauteloso cu lama.
