ORANJESTAD (AAN): E eleccion di Papa Leo XIV a tuma luga den un tempo excepcionalmente cortico.
Segun dato publica pa e medio La Nación di Costa Rica y basa riba fuente di Vaticano, e conclave pa escoge Leo XIV como Sumo Pontifice a dura solamente dos dia cu cuater votacion, un tempo cu ta comparabel cu esunnan di Juan Pablo I y Benedicto XVI, cu tambe a ser elegi den mesun cantidad di dia y votacion.
E estadistica di e ultimo 11 conclave den Iglesia Catolico ta mustra cu hopi bes eleccionnan papal por dura hopi mas largo. Pa ehempel, Papa Pío XI a necesita 14 votacion durante 5 dia pa bira papa, mientras cu Papa Juan XXIII a ser elegi despues di 11 votacion den 4 dia.
Leo XIV su eleccion rapido ta indica un grado halto di consenso entre e kardinaalnan, un situation no semper comun den historia di eleccionnan papal. E conclave cu a bira e mas largo den e lista tabata esun di Pio XI, cu por ta refleho di diferencia di opinion entre e kardinaalnan den tempo ey.
Na contrario, e casonan di eleccion di Leo XIV, Juan Pablo I y Benedicto XVI ta demostra cu den cierto momento, e Colegio di Kardinaal por yega na acuerdo rapidamente, sin hopi discusion prolonga.
Cu e eleccion di Leo XIV, ta mira un otro ehempel di cambio rapido den liderazgo di Iglesia Catolico, cu ta sigui refleha su capacidad pa adapta y unifica su liderazgo spiritual den momento di transicion.
