Caso di Tetra-Radio conoci como ‘caso New York’
- Ta pensando si acaso lo apela e caso
ORANJESTAD (AAN): Diabierna mainta a tuma lugar den Corte, e caso penal cu den circulo di husticia ta conoci como ‘Caso New York’. Y ta relaciona cu algun Tetra-Radio di Polis cu tabata conecta na computernan y automaticamente tabata transmiti tur combersacion policial pa cietro medio di prensa.
Despues cu e caso a keda cla, Ministerio Publico a splica cu nan a exigi den e caso penal cu e nomber ‘New York’ contra e agente policial Vos un castigo di prison di 36 luna, di cual 8 luna ta condicional. Ademas Ministerio Publico a exigi un prohibicion pa ocupa cargonan publico pa un periodo di 5 aña.
E sospechoso Vos a worde acusa di malversacion, abuso di funcion, soborno y participacion na un organizacion criminal.
Na comienzo di aña 2023, a lanta e sospecho cu V. tabatin aceso na algun Tetra-Radio horta di Cuerpo Policial di Aruba. Durante un razzia na Maart 2023, a bin haya varios Computer Laptop y Tetra-Radio na cas di Vos. E Tetra-Radionan aki di Polis tabata conecta na e Computer Laptopnan. For di investigacion di BIV (bureau integriteit en veiligheid di Cuerpo Policial di Aruba) y investigacion tecnico a sali cu periodistanan a duna Vos e ekipo y software pa usa pa difundi comunicacion policial na un manera integral.
Ministerio Publico a splica cu ta pesey cu Vos ta worde acusa di a transmiti informacion policial na varios periodista di newssites conoci na Aruba durante varios aña, por lo menos mas cu dos aña. For di e dossier di e caso ta sali cu el a ricibi sumanan di placa y regalonan en cambio.
Dor di permiti periodistanan scucha comunicacion di polis, Vos a viola su ‘ambtsgeheim’ y a abusa di su posicion. Informacion tocante tercer partinan lo por a yega di e manera aki na periodistanan y posiblemente tambe na otronan.
Di e forma aki Vos a viola e confianza cu por worde spera di dje como agente policial. Integridad y rectitud mester ta primordial cerca un ambtenaar. Especialmente V., den su posicion como Barrio-Regisseur, tin un rol ehemplar. Ademas V. a crea un riesgo pa su coleganan di KPA y pa ciudadanonan. Pues tur melding cu tabata pasa via Tetra-Radio tabata por a yega tambe na orea di hendenan pa kendenan esakinan no tabata destina. V. no ta parce di ta consciente di esey.
Como parti di e investigacion aki, a scucha cuatro periodista como sospechoso. Si e periodistanan aki lo worde persigui penalmente of no, lo keda dicidi despues.
Corte a dicta inmediatamente y a condena Vos pa un castigo di prison di 16 luna, di cual 8 luna ta condicional. Ademas huez a prohibi Vos pa ocupa cargonan publico pa un periodo di 3 aña. V. a worde condena pa malversacion, violacion di ambtsgeheim, abuso di su funcion y corupcion door di miembronan di prensa. El a worde declara liber di participacion na un organizacion criminal.
Ministerio Publico lo studia e sentencia prome cu dicidi tocante eventualmente bay den apelacion.
