Roy Mezas, Coordinador di e programa, a splica:
ORANJESTAD (AAN) – Kiwanis Club Palm Beach a yama un conferencia di prensa relaciona cu e traspaso di e Programa Stimami Guiami, pa Fundacion pa Nos Muchanan.
E presidente di Kiwanis Club Onasito (Chito) Thiel a haci un introduccion cortico y menciona cu e programa aki a inicia na aña 2021 y Kiwanis ta para tras di dje 100% for di inicio. El a comenta cu despues a bin e temporada di Covid, cu tabata tin contratempo, pero asina mes a sigui traha riba dje. Mesora, Onasito a pasa palabra pa señor Roy Mezas, cu ta e coordinador di e Programa Stimami Guiami, cu a wordo inicia door di Kiwanis Club Palm Beach y awo ta wordo ehecuta pa Fundacion pa Nos Muchanan.
“Pa Kiwanis Palm Beach Club tabata semper un buskeda na un programa di algo cu ta haci impacto den comunidad, pasobra nos tabata duna hopi checks pa yuda cu fondonan na diferente fundacion, pero sin por a midi kico e resultado y efecto di bo donacionnan ta.
Nos ta un organizacion cu ta enfoca hopi riba e hobennan, esey ta internacionalmente y na Aruba tambe, y nos tabata busca un manera di haya sa kico e necesidad mas grandi ta pa nos hubentud na Aruba. Anto, nos a haci un encuesta na 2019 cu un organizacion cu a yuda nos profesionalmente, pa haci un encuesta cu mas di 400 surveys por escrito; 18 Fundacion cu nos a papia cu nan, 55 persona nos a entrevista, anto a bin tres recomendacion cual e prome ta masha importante cu ta ‘siña nos siña e mayornan na Aruba con pa cria nan yiu miho, mas moderno, mas responsive compara cu antes’. Esey no kiermen cu no tabata bon kico nos ta haci, pero semper bo por siña mas”, Mezas a indica.
Esaki ta un recomendacion cu Kiwanis Club Palm Beach a tuma hopi na serio. Kiwanis a pone fondo acerca, na 2020, pa nan cuminza prepara e programa pasobra e ta un programa educativo, y a busca un persona cu ta Rocco Hunt, presente tambe na mesa durante e conferencia di prensa aki. E ta un experto pa desaroya e curriculum, pa e contenido pa e programa, Mezas a señala.
“Nos a tume como algo hopi importante. Kiwanis a bisa cu esaki ta algo pa duna bek na comunidad di Aruba, a largo plazo. E ta algo cu nos ta kere cu ta bay keda pa semper, pasobra e ta un programa pa muchanan di 0-4 aña, cu ta un bon base y fundeshi pa nan futuro, y mi ta kere cu si Aruba, nacionalmente, participa e proximo añanan na e programa aki, nos lo haci un impacto den cambio den comunidad na un manera positivo. Y nos ta sigui inverti den dje”, Mezas a señala.
