Segun Frans Ponson, presidente di CUA:
- Tin cu ta bay inverti miyones di Florin
ORANJESTAD (AAN) – Frans Ponson, presidente di Comerciantenan Uni Aruba (CUA), den entrevista cu DIARIO, a comenta cu hopi edificio na Caya Grandi a cera y keda para bashi, y tin di nan cu tin diez aña caba cera y den mal condicion.
El a declara cu despues cu nan a divulga y mustra e plannan serio cu tin pa rebiba y lanta Caya Grandi back, e reclamo cu tin awo ta e prijsnan excesivo pa huur edificio.
Ponson a bisa cu den otro paisnan na mundo tin leynan, y esaki ta algo importante pa Aruba pasobra si como turista bo ta bin bishita Aruba y pasa den taxi na Caya Grandi wak esey, esaki ta duna un mal impresion di e pais.
El a señala cu na hopi pais na mundo Gobierno ta take care di dje, den sentido di buta un ley y comercio ta para p’esey. “Nos tin cu pasa un ley na Aruba, cu mas cu bo ta den Caya Grandi, aunke bo no por hacie di biaha, ban bisa den dos aña di tempo, bo ta bay bende bo compania of bo tin cu renove. Y bo mes ta hinca hende den dje”, Ponson a señala.
El a comenta cu el a wak na Hulanda cu tin un ley unda cu si bo ta buta un prijs y bo no por huur e edificio, nan ta duna bo un tempo si no gobierno ta drenta aden y baha e prijs di huur.
“Nos tin cu resolve e problema aki. Awo cu nos a sali dilanti bin cu ne, nos miembronan kier haci un cambio. Pero nan tampoco no ta full e Caya Grandi.
Kiermen, nos tin cu atende full e asunto aki, no sigur pa sinta cu nan wak nan posibilidadnan, pero si nan ta invirtiendo aworaki, mi ta garantiza bo 100 cu nan ta bay buta hende den nan huur, pasobra si nan ta bay inverti miyones aworaki pa traha un edificio, mi garantiza bo cu ora nan keda cla, nan no lo kier’e bashi. Kiermen, nan lo haci loke nan mester haci pa buta huur eynan”, Frans Ponson a indica.
Pa e edificionan cu a keda para eynan mester bin un cambio, pero esey ta Gobierno mester atende cu esaki por completo. Y yama tur hende pa un reunion, y e mester worde drecha.
Ponson a referi na un edificio cu tin diez aña para tur mahos cu ta duna mal impresion pasobra tin un chollerhouse banda di dje. “Kiermen, e ta algo cu nos tur tin cu atende cu ne” presidente di CUA a remarca.
