Coronavirus: --- ORANJESTAD (AAN): Un muher israeli na estado, di 30 aña, a bira e prome persona na mundo cu a wordo detecta un contagio di coronavirus y griep pareu.
E infeccion dobel a wordo defini como 'flurona' (flu+corona) y actualmente expertonan a cuminsa studia esaki.
Pa suerte, e pashent infecta pa ambos virus a mustra sintomanan leve, apesar cu e no tabata vacuna, si contra covid y tampoco contra griep. E deteccion di flurona a tuma lugar den Hospital di Beilinson, den ciudad di Petaj Tikva, Israel, na unda e pashent recientemente a duna luz.
Algun informe local a señala cu esaki tabata e prome caso na unda e dos malesa a combina y detecta, aunke ta posible cu mas persona ta contagia cu e dos virus, pero esaki no a wordo detecta. Expertonan di Ministerio di Salud di Israel ta analizando si e dos virus ta nifica un enfermedad cu mas riesgo of grave.
-Flurona, segun CDC
Segun un informe realiza riba website di Centro pa Control y Prevencion di Malesanan (CDC) relaciona cu flurona, e dos enfermedad -coronavirus y griep, of influenza- ta malesanan respiratorio contagioso, pero ta causa pa diferente virus. Esaki ta nifica cu tin posibilidad di pensa cu e combinacion di virus por ta un variante nobo di Covid-19.
Covid-19 ta propaga mas facilmente cu griep, segun CDC. “Sin embargo, na medida cu mas persona vacuna contra Covid, e propagacion di e virus cu ta causa esaki mester a disminui”, nan a señala.
Debi cu algun sintoma di coronavirus, griep y otro enfermedad respiratorio ta similar, pa diferencia cada un no por basa esaki solamente riba sintomanan. “Personanan por infecta tanto cu griep como cu virus cu ta causa Covid-19 na mesun momento y presenta sintoma tanto di influenza como di Covid-19″, CDC a splica.
WHO (Organizacion Mundial di Salud) tambe a asegura cu ta posible “contrae ambos enfermedad den mesun tempo” y cu ambos ta comparti sintomanan similar, manera tosamento, slijm, keintura, dolor di garganta, dolor di cabes y fatiga. Nan ta recomenda pa sigui cu distanciamento social, usa tapaboca cu ta ahusta riba cara, evita lugarnan cu hopi hende y mal ventila, habri bentana y porta pa mantene cambernan bon ventila, usa hand sanitizer y laba mannan frecuentemente.
