E sumanan cu Lotto pa Deporte a paga na Tera Group ta prueba - E rapport di Refineria di Aruba ta otro fuente di pregunta serio - Cuanto consultant Pueblo ta sostene pa beneficio partido politico?
ORANJESTAD(AAN)- Cuanto consultant un empresa priva cu mester gasta su propio fondonan ta gasta na asina yama consultant y kico ta produccion di e consultantnan aki?
Un pregunta serio cu nos ta haci despues di rapportnan cu ta cay den nos man y cu ta duna prueba, con consultant por wordo considera un banco di oportunidad pa personanan of companianan cu politiconan na mando kier favorece.
Aruba ta un isla chikito y no ta dificil pone uno cu uno pa yega na e suma di “dos”. Ta increibel tuma nota cuanto hende ta wordo emplea pa cuanto tarea na companianan di Gobierno of den proyectonan cu Gobierno ta inventa.
Na tanto ocasion DIARIO a pidi pa investiga e rapport “Bo Aruba” cu ta un ehempel con Gobierno Mike Eman a dicidi riba placa di Pueblo sin reserva of responsabilidad.
Ora nos tuma nota di e rapport cu ainda ta na Ministerio Publico di Refineria di Aruba, atrobe nos por mira con dushi ta pa politiconan uza placa di Pueblo na un forma cu hamas nan lo uza placa cu mester bandona nan cartera.
Kico mester pasa?
Nos ta para keto riba e informacion di Lotto pa Deporte cu a entrega casi 500 Miyon di Florin na un compania pa mercadeo y relacionnan publico, cu ta un compania cu mester a percura pa propaganda pa Lotto pa Deporte den publico.
Den cuanto tempo e compania a gana e suma aki? Pakico Lotto pa Deporte mes no por a atende su publicidad y cuanto lo a costa Lotto pa Deporte pa hasta tuma un profesional den su servicio si di berdad e no tin ningun hende capaz pa haci e trabou?
Ora mira unda placa di Aruba ta keda, mester bay na e forma cu e placa ta wordo gasta.
Manera ta para tira piedra chikito na awa, asina ta gasta placa cu sumanan chikito cu aparentemente den e Miyones cu Pueblo ta paga na belasting, lo no mester haci tanto diferencia.
Si pone tur e sumanan hunto, ta yega na un capital cu no ta politiconan ta paga na e consultantnan cu nan kier, pero cu Pueblo ta paga y ta sigui paga.
Pakico te awe tin hende ta vota pa Mike Eman y Benny Sevinger por ehempel? Kico segun Rapport Bo Aruba por ehempel nan a haci cu placa di Pueblo? Kende a dicidi kende lo haya oportunidad pa gana placa for di e fondo di Pueblo cu ta for di tur control?
E rapport di Refineria di Aruba no por perde for di atencion. Un refineria cu nunca a bira realidad, manera tur hende cu no ta mira fantasma a spera, a permiti otro abuso di placa di Pueblo.
Tin trabou pa traha den Parlamento di Aruba. E rapportnan Bo Aruba y Refineria di Aruba hunto cu e weganan manera di Lotto pa Aruba, ta papia un idioma cla.
Mester dal porta cera pa tur loke ta parce for di normalidad den gastonan di Aruba, cu no por sigui sostene loke tin tur aparencia di favoritismo politico den cual ta uza consultant mientras aparato Gubernamental y companianan di Gobierno mes tin tanto hende cualifica cu Pueblo ta paga!
