E loke mas grupo grandi na Merca tabata teme awor ta realidad --- *Kico lo pasa si awor Rusia yuda Venezuela paga tur debe di Citgo? --- *Desaroyonan actual ta entrega un aviso pisa na politiconan di Aruba
ORANJESTAD (AAN)- Na 2017 Evelyn Wever-Croes a hereda un Aruba den problema serio.
E cero di problema economico y financiero tabata parce e reto principal.
Pero Aruba tabata confronta un reto mucho mas grandi, cu DIARIO na 2018 a expone den un cantidad di articulo exclusivo a base di investigacionnan local y internacional.
Citgo y e peligro real cu e tabata encera pa Aruba, a keda presenta den articulonan cu mester a deshaci di un fantasia cu tabata biba na Aruba y cu realmente tabata tin Aruba rehen.
E decision mas pisa cu Prome Ministro Evelyn Wever-Croes mester a tuma den su bida, sin duda tabata pa bay busca e yabinan di refineria cerca Citgo y deshaci di e acuerdo di Citgo cu na 2018 porfin a bira realmente conoci na Aruba ora e acuerdo den su totalidad realmente a wordo entrega na Parlamento.
Tabata un decision sumamente pisa pa un politico pa pone fin na un speransa falso cu a wordo crea cerca e Arubiano pa kere cu Venezuela den e posicion cu e ta, por a trece Citgo, cu ni sikiera ta realmente propiedad di Venezuela mas pero ta pertenencia di un grupo di inversionista y di Rosneft di Rusia.
Awe un les ta keda presenta na politiconan di Aruba, cu na 2016 a baila den e creencia cu e compania por a cambia suerte di Aruba cu ya tabata hoga den debe.
E crecemento economico cu a wordo priminti dor di Gabinete Mike Eman, no a papia di e peliger politico grandi den Citgo, cu awe ta rementa.
Mas y mas na Merca e peligro di Citgo ta bini na claridad, pasobra na Merca e problemanan serio den Citgo ta continua y te ainda Hueznan ta na careda y ta trata hasta di busca un forma pa actua enfrente e proteccion di Gobierno Mericano na Citgo.
Te awor Rusia tin 49 porciento di e accionnan di Citgo, cu te ainda ta parti di e casonan cu ta wordo presenta na Huez dor di cantidad di compania cu Citgo of Gobierno Venezolano debe.
Informacionnan entorno Citgo awe ta yena cu peligro.
Kico lo pasa si Rusia interveni y cumpra parti di e debenan di Citgo enfrente otro gruponan?
Kico lo pasa si Rusia mester haya mayoria di accionnan di Citgo den su man?
Awe e temor cu tabata existi for di momento cu Nicolas Maduro a entrega Rusia casi mita di Citgo como borg pa haya placa, ta haya motibo.
E hecho cu Merca no ta reconoce Nicolas Maduro pero Guaido, te awor ta e base legal cu ta stroba Nicolas Maduro haci y deshaci cu Citgo manera e kier.
Pero si Rusia pone presion pa bende Citgo pa e haya e placa cu e mester haya of logra haya mas accion, kico lo pasa?
Informacionnan cu DIARIO ta ricibi entorno Citgo ta duna prueba cla di e forma cu Aruba a scapa di ta awe rehen di un compania, caminda e crisis mundial actual por bira un Cabay di Troje na Merca, cu ta e bentaha cu Citgo a entrega Vladimir Putin, dirigente di Rusia, cu tin Nicolas Maduro como su rehen financiero!
