Bo salud
ORANJESTAD (AAN): Cualkier persona por contrae Sarampi (conoci na ingles como ‘Measles’) pero tin un grupo den nos comunidad cu nan riesgo pa contrae esaki y por bira hopi malo di esaki ta mas grandi. Esaki ta e motibo pakico e grupo aki mester ta mas consciente. E grupo aki ta encera:
(*) Mucha bao 5 aña cu no ta vacuna contra Sarampi.
(*) Individuo cu tin un sistema immunologico debil/ abao/ comprometi.
(*) Hende muher na estado.
Na Aruba, comunidad ta hopi bon vacuna cu un promedio di 95%, esaki ta e motibo pakico asta esnan no vacuna ta worde proteha pa e grupo grandi cu ta vacuna (Herd Immunity). Pero na momento di biaha pa un pais unda Sarampi ta activo, ta importante pa e grupo di esnan no vacuna ta conciente cu nan riesgo pa contrae e virus ta bira grandi.
Ken ta proteha of no contra Sarampi ta desconoci, pesey ta importante pa tur hende ta conciente di kico ta Sarampi, sintomanan di Sarampi, con Sarampi ta transmiti su mes y con pa proteha bo mes di esaki.
Pa mas informacion por check na e website www.dvg.aw cu ta esun di DVG Aruba.
