ORANJESTAD (AAN): E empresa local Tempo Aruba por wak bek atras cu orguyo, con exitoso nan Job Fair 2024 a resulta. Esaki a tuma lugar Diabierna cu a pasa, esta 8 di maart.
E evento, cu a tuma lugar na e oficina di Tempo Aruba na Oranjestad, a hunga un rol clave den empodera buscadornan di trabao pa explora y navega den e mercado laboral mientras cu nan a ricibi asistencia valioso pa cuminsa nan carera ideal.
Cu un compromismo firme pa stimula crecemento economico y prosperidad na Aruba, Tempo Aruba a organiza e Job Fair pa asina por brinda na e pueblo di Aruba un plataforma pa investiga y explora un variedad di oportunidadnan laboral den diferente industria y sectornan.
E evento a conta cu presencia di diferente personanan cu diferente interesnan laboral y educacion, for di e recien graduadonan te na e profesionalnan cu experiencia, ofreciendo e posibilidad pa ricibi asistencia y informacion tocante e oportunidadnan cu lo pas mas cu nan necesidadnan.
Hasta pa esnan cu no por a atende e Job Fair personalmente, Tempo Aruba ta sigui brinda asistencia a traves di su plataforma di registracion online cu por wak riba nan website: www.tempoaruba.com, y tambe asistencia den persona na nan oficina cu ta situa na Caya G.F. Betico Croes 155 Oranjestad. Tempo Aruba su dedicacion ta na sigura cu henter e comunidad di Aruba tin acceso na e recursonan necesario pa por logra nan metanan profesional.
Mientras Tempo Aruba ta refleha riba e impacto di e Job Fair 2024, e compania ta reafirma su compromiso na su mision pa empodera individuonan pa realiza nan potencial den e mundo laboral.
