ORANJESTAD (AAN) Jasmira Mora, POH, den entrevista cu Matutino DIARIO, a duna di conoce cu na November aki,
e curso pa 14 POHnan nobo a cuminza y esaki ta bayendo hopi bon. Nan a haya hopi bon feedback di e Docentenan, cu ta di Hulanda, y nan ta hopi entusiasma cu e grupo aki. El a comenta cu 90% pa 95% di docternan di cas tin un POH trahando cu nan.
Mora a bisa cu e por a compronde cu tin pashentnan cu ta yegando aworaki na Dialisis, y esaki no ta bin di un dia pa otro. E ta un proceso cu ta tuma di diez pa 15 aña mes, si e persona no a controla su mes. “Esaki ta e temporada mes cu POH a wordo introduci pues bo lo haya un subida di dialisis, probablemente, y e meta ta cu e POHnan cu a cuminza un 12 aña pasa, den futuro cercano e pashentnan di dialisis lo cuminza baha of alomenos stabiliza” Jasmira Mora a señala.
El a agrega cu mester corda cu no tur pashent ta haci uso di un POH. “Esey ta hopi fastioso pa nos, e POH teynan, nos kier yuda e hendenan. Y tin hende tambe cu nos tin hopi historia exitoso, e pashentnan ta bay bon, a controla e sucu, y nos ta contento. Nos kier enfoca riba tur esnan cu a haci nan best, pa tuma control di nan malesa”, Jasmira a indica.
El a expresa cu Diabetes ta un problema cu kizas hopi hende no ta acepta, y si nan no acepta cu nan tin e malesa nan no ta bay haci nan best. “Semper nos ta bisa cu nos porta ta habri. Cu nan por acerca un POH ki ora cu nan kier”.
E tambe a comenta cu e POHnan a bishita por lo menos 12 pa 13 hotel y instancianan, den transcurso di aña, pasobra na December nan ta stop debi cu e temporada aki ta bira mucho druk.
“Pero mi tin cu bisa si cu, lamentablemente, den e parti di inspeccion eynan nos ta constatando cu tin mas adulto hoben, cu tin entre 20 pa 30 aña, cu no sa cu nan sucu ta halto; pa e motibo tambe cu e sucu no ta duna ningun tipo di sintoma, of nan ta relata e sintomanan na algo otro. Pero nos ta contento di haci e tipo di control di salud aki, cu nos por manda e pashentnan aki di biaha na un POH. Si e pashent tin un docter di cas cu tin un POH e liña ta hopi cortico”, el a relata.
