ORANJESTAD (AAN): IPA ta informa cu esnan cu ta desea di haci e estudio pa Maestro di Enseñansa Primario pero pa motibo di
circunstancia di bida no a logra termina sea HAVO, VWO of MBO nivel 4, cu 21+ Toets esaki por bira realidad! Tur persona cu desde 1 di september 2026 tin minimo 21 aña y cu kier haci un estudio na IPA, pero no tin diploma di sea HAVO, VWO of MBO nivel 4, por inscribi pa haci e asina yama 21+ Toets. E 21+ Toets ta midi si bo tin nivel di havo cu ta necesario pa por studia na IPA. Si bo logra pasa e 21+ Toets cu exito, por inscribi pa un estudio inicial cu IPA lo ofrece durante aña academico 2026-2027.
Inscripcion
Por bin na remarke pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2025-2026. Si logra pasa e test di admision cu exito y completa e programa preparatorio bo por cuminsa cu bo estudio na augustus 2026.
Anochi di informacion
Diaranson dia 1 di october 2025 lo tin un anochi di informacion na IPA. Esnan interesa lo haya splicacion di kico 21+ Toets ta encera. Alabes lo elabora riba contenido y trata ehempel di tarea di diferente materia cu ta forma parti di 21+ Toets. E anochi di informacion ta di 7:00 pm - 8:30 pm y lo tuma na Sala Madonna di IPA (Isaac Wagemakerstraat 11, San Nicolas).
Inscripcion
Tur persona cu ta interesa pa haci 21+ Toets por inscribi via e website www.ipaaruba.com. Pa por inscribi mester cumpli cu e pago di AWG 100,- y pone como anexo copia di comprobante di pago den formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. Na final bo lo ricibi confirmacion di bo inscripcion. E ultimo dia pa inscribi pa 21+ Toets ta 12 di januari 2026. Despues di e fecha aki no tin posibilidad mas pa inscribi.
