Razzia den cuadro di Caso Portulaca:
ORANJESTAD (AAN): Ministerio Publico a informa diamars cu Landsrecherche, bao guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), a tene razzia na 6 lugar rond di Aruba. Nan a tene e ‘entradanan hudicial’ aki na 2 cas, dos negoshi, Bestuurskantoor (Ministerio di Integracion, Labor y Energia) den Cocolishi, y edificio di DIMAS.
E razzianan aki aki a tuma lugar den cuadro di un investigacion di Landsrecherche di posibel delitonan di corupcion y otro hechonan castigabel relaciona cu otorgamento di permisonan di estadia entre 2020 y 2022. E investigacion aki ta conoci bou di e nomber di Portulaca.
Durante e entradanan hudicial aki, a tuma Portable Harddisk, USB Memory Sticks, y administracion den beslag. Te na e momento aki, 3 persona a keda deteni.
E investigacion di Caso Portulaca ta draai rond di e pregunta si companianan por a obtene permisonan di estadia pa nan empleadonan a base di motibonan cu no ta cuadra cu ley.
Segun Ministerio Publico, e entradanan hudicial y ‘doorzoeking’ di Diamars a keda conclui. E investigacion penal ta sigui.
Pa awor Ministerio Publico lo no saca mas informacion. Den caso di desaroyonan particular den e investigacion, esey lo wordo comunica despues via un boletin pa prensa.
Den DIARIO di awe por lesa reaccion tambe di Ministro Glenbert Croes encuanto e razzia aki.
