Como 161 razzia teni caba na Venezuela
CARACAS: Fiscal General na Venezuela, esta Tarek William Saab a informa e siman aki cu e cantidad di funcionario deteni pa cu e caso di corupcion rond di e compania petrolero estatal PDVSA, a yega na 58 aresto.
El a agrega tambe, cu orden di aresto a wordo emiti pa 18 persona mas, cu tin di wordo deteni ainda. Den cuadro di e investigacion, Polisnan di PNCC a ehecuta 161 razzia. Den e entradanan hudicial aki, nan a confisca monton di material di prueba na diferente oficina y cas.
A ser splica, cu den e bol di hilo aki cu ta involucra PDVSA y e Superintendencia di Criptoactivo, nan a haci 99 entrada hudicial rond di henter Venezuela, y a emiti 53 ordo di aresto. Mientras cu den e caso di Corporacion Venezolana de Guayana (CVG) nan a tene 48 entrada hudicial y 13 ordo pa detencion.
Segun Fiscal General, tin tres ordo di aresto tambe emiti pa funcionarionan vincula cu e compania estatal Cartones de Venezuela, y den e investigacion ey nan a ehecuta 7 entrada hudicial. Den e investigacion rond di Poder Judicial, nan a duna seis ordo di detencion, y a tene 6 razzia tambe.
Dialuna cu a pasa, Fiscal General a bisa cu tur e accionnan aki ta pa sanciona e “mafiosonan” den e cuadro di operacion anti-corupcion cu Gobierno a denuncia na luna di Maart, y cu a hasta pone Ministro di Petroleo, Tareck El Aissami pa entrega su retiro.
President Nicolas Maduro a pidi autoridadnan hudicial pa castiga di forma “ehemplar” tur e funcionarionan implica den e escandalo aki, di cual tin tambe tin Hueznan envolvi, un ex-Gobernador, y miembronan di directiva di PDVSA.
Fiscal General Saab a duna varios declaracion riba e avanzenan di investigacion, pero te ainda e no a duna nada ainda di e suma di placa cu e desfalco aki ta encera.
