ORANJESTAD (AAN): E asina yama International Order of the Rainbow for Girls ta invitando mucha muhernan pa bay cera conoci cu nan organizacion.
Tabata 19 aña aña pasa International Order of the Rainbow for Girls a worde treci Aruba pa asina crea mas lider di hobencita den nos comunidad. IORG ta un non-profit youth service organization pa hobencita di 11 pa 20 aña. E organizacion ta yuda cada hobencita haya mas confianza propio y liderato via di servicio comunitario. Otro aña International Order of the Rainbow for Girls lo ta celebrando su di 100 aña y lo worde celebra na Oklahoma, unda e prome organizacion a worde funda.
Recientemente e directiva di hobencita pa e proximo 6 luna a ser anuncia y e tema ta “Growing with Rainbow” pa e periodo aki; creciendo hunto den e organizacion aki y lidera pa e hobencita Veronique Santanilla. Mas cu 20 hobencita a worde instala pa nan puesto nobo. E organizacion aki ta worde guia door di un grupo di 13 adulto/ mayor voluntario.
E hobencitanan aki ta worde getrain nan liderazgo y confianza propio door di trabao di servicio comunitario. Pa finalisa, cada hobencita ta haci su mesun reunion, avansando den e organizacion cu diferente funcion y na final presidente. Cada board tin un mentor cu ta coach e hobencitanan aki door di guia e plan y ehecucion di proyectonan, por ehempel trabao caricativo, actividad social y hopi mas.
Bo conoce un hobencita cu lo por ta interesa pa haya sa mas di e organizacion aki y kier bira miembro? Lo tin un atardi informativo diasabra 27 di november di 1:30 pm pa 2:30 pm na Lodge El Sol Naciente, Cumana 26.
