*Mi a traha cu hopi satisfaccion
ORANJESTAD (AAN) -- Ing. Marlon Croes, den conferencia di prensa di Gobierno a hiba palabra, relaciona cu su decision di pidi retiro di Gobierno, den e caso aki Director di Departamento di Obranan Publico (DOW) for di entrante 31 di December 2024.
Ing. Croes a bisa cu dia 16 di September aki, ta précis 35 aña y mey cu el a cuminza traha na DOW, unda el a traha cu hopi satisfaccion. El a traha duro y DOW tabata p’e un vehiculo cu a siñ’e hopi cos di e trabao, manera tecnica, deal cu hende, negocia, yega na areglonan, aunke e no ta hurista a siña habilidad cu e huristanan.
“Den e proceso aki, mi kier a gradici e oportunidad cu gobierno a brinda mi pa por a labora den esaki y por a colabora cu Aruba. 35 aña, pa mi, a pasa hopi lihe. Mi mes a desea di bay bek, sali di gobierno na 1994, pero mi director e tempo ey a convence mi pa keda y el a bira 30 aña extra. Mi tabata tin un periodo di ongeveer dos aña, cu tabata cana cu e idea di ‘mi ta bay, no bay’, ‘mi ta bay, no bay’ y mi a yega na e conclusion cu pa mi mesun desaroyo, crecemento di conocemento, mi tin di haci un cambio. Y mi a combersa cu Minister Presidente algun siman atras, pa ser exacto prome den April caba, y na Juli, 15 pa ser exacto, mi a entrega mi carta di retiro y mi a keda traha y lo sigui traha te 31 di December, manera mi a traha semper. Y mi ta keda gradici tur e ministernan cu mi a traha cu ne, y ultimamente Minister Presidente, Evelyn Wever-Croes, cu mi a traha cu hopi placer cu ne e ultimo añanan aki y tambe no ta keda nada mas cu DOW mes, su personal cu mi a traha tremendamente bon cu nan.
Un tremendo ekipo, y mi ta spera cu pronto nos por apunta, hunto cu Minister Presidente, un reemplazante di mi persona, y asina garantiza cu DOW lo sigui crece den futuro y bira un departamento mas automatiza, mas digitaliza cu ora mi bay lague”, Marlon Croes, director di DOW, a señala.
