Relato di Oficina Central di Estadistica
ORANJESTAD (AAN): E siman aki, Oficina Central di Estadistica (CBS) a emiti nan rapport encuanto e indice CPI pa luna di Januari 2026.
Nan ta indica cu e Indice di Prijs di Consumo (CPI) pa luna di Januari 2026 ta 109.19, loke ta representa un caida di 0.3% compara cu e indice di December 2025 (109.47). E cambio di e CPI pa e ultimo diesdos (12) lunanan (Januari 2025 te cu Januari 2026) ta 0.5%, un subida di 0.2 punto di porcentahe (ppt) compara cu e periodo corespondiente di aña pasa (0.3%). E promedio anual (ultimo 24 luna) di e tasa di inflacion pa e periodonan di Januari 2024 te cu Januari 2025 y Januari 2025 te cu Januari 2026 ta 0.1%, un caida di 1.5 ppt compara cu e 1.6% registra den e periodonan di Januari 2023 te cu Januari 2024 y Januari 2024 te cu Januari 2025.
Durante e luna aki, 5 di e diesdos sectornan a registra caida di prijs. E caidanan cu tabata tin e mayor efecto riba e CPI a wordo registra pa e sectornan di “Transporte” (-3.0%), “Paña y sapato” (-6.1%) y “Recreaccion y cultura” (-1.5%), causando un efecto di respectivamente, -0.39, -0.13 y -0.13 ppt. E caidanan den e sectornan restante a contribui cu un efecto di -0.07 ppt riba e CPI di Januari 2026. E caidanan aki a wordo contraresta parcialmente door di principalmente un subida den e Indice di e sector di “Mobilario” (3.2%) cu a contribui cu un efecto di 0.26 ppt riba e CPI di Januari 2026. E subida den e sectornan restante a contribui cu un efecto di 0.20 ppt riba e CPI di Januari 2026.
E caida den e sector di “Transporte” a wordo causa principalmente door di un caida di 3.3% den e categoria “Gasto relaciona cu uso di vehiculo di transporte personal”, causando un efecto di -0.26 ppt. E caida den e sector di “Paña y sapato” a wordo causa principalmente door di un caida den e categoria “Paña” (-5.4%), causando un efecto di -0.09 ppt. E caida den e sector di “Recreacion y cultura” a wordo causa principalmente door di caidanan di 3.4% y 2.3% den e categorianan “Vacacion” y “Otro articulo y ekipo pa recreaccion, hardin y animal domestico”, causando un efecto di respectivamente, -0.07 y -0.06 ppt. E subida den e sector di “Mobilario” a wordo causa principalmente door di subidanan di 7.9% y 17.2% den e categorianan “Aparato pa uso domestico” y “Herment y ekipo pa cas y hardin” (17.2%), causando un efecto di respectivamente, 0.16 y 0.13 ppt.
Canasta di consumo: E asina yama canasta di consumo di e CPI ta consisti di 408 bienes y servicionan. Compara cu December 2025, 48.0% di e bienes y servicionan aki a conoce un aumento di prijs causando un efecto di 0.74 ppt, mientras cu 36.5% ta mustra un caida di prijs, cu a contribui cu un efecto di -0.99 ppt y pa e restante 15.4% no tabata tin cambio den prijs. Compara cu December 2025, prijsnan di bienes (-0.1%) y serviconan (-0.4%) a conoce caida y a causa un efecto di respectivamente, -0.07 y -0.18 ppt riba e CPI di Januari 2026.
Core inflation: E CPIC (core inflation) - CPI excluyendo e efecto di energia y cuminda - a registra na Januari 2026 un subida di 1.0%. E indice di energia - cu ta consisti di e productonan: electricidad, awa, gasolin y diesel - a registra un caida di 3.9%. E indice di cuminda a registra un subida di 0.4%.
