Den e ultimo 12 luna
ORANJESTAD (AAN): E indice di “Cuminda & servicio di catering” a registra un caida di 0.1% na Juni 2024, despues di a registra un subida di 0.3% na Mei 2024. E indice di “Cuminda na cas” (-0.2%) a registra un caida, unda ocho di e diesun indice di e gruponan di cuminda na cas a baha na Juni 2024.
E indice di “Fruta” a conoce e caida di mas grandi (-2.9%) na Juni 2024. Otro caidanan significante a wordo registra den e indicenan di “Berdura” (-1.4%) “Batata, yuca y batata dushi” (-1.2%) y “Lechi, keshi y webo” (-1.1%).
E subida mas grandi a wordo registra den e indice di “Carni” (1.2%) na Juni 2024.
E indice di “Cuminda pafo di cas” a registra un subida di 0.2% na Juni 2024.
Na Juni 2024, “Cuminda na cas” y “Cuminda pafo di cas” como grupo, tawata tin un caida di prijs di 0.1% compara cu Mei 2024 y hunto tawata tin un influencia di -0.02 ppt riba e CPI, mientras cu e restante bienes y servicio hunto a experencia un caida di prijs di 0.7% y tawata tin un efecto di -0.61 ppt riba e CPI.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 3.2%. E indice di “Cuminda na cas” a conoce un subida di 2.6%, unda nuebe (9) di e diesun (11) indicenan di e gruponan di “Cuminda na cas” a subi durante e periodo aki.
E indice di “Sucu, jam y otro tipo di cos dushi” a conoce un subida di 9.2%, e subida mas grandi entre e gruponan di “Cuminda na cas”. Ademas otro subidanan significante a wordo registra den e indicenan di “Bebida no-alcoholico” (4.7%), “Restante productonan pa alimentacion” (3.6%), “Lechi, keshi y webo” (3.6%) y “Fruta” (3.0%). E caida mas grandi durante e periodo aki a wordo registra den e indice di “Pisca y otro cuminda di lama”
(-3.7%).
E indice di “Cuminda pafo di cas” a registra un subida di 4.5% den e ultimo diesdos (12) lunanan.
