Docter Joel Rajnherc, director ImSan:
ORANJESTAD (AAN) – Den entrevista cu DIARIO, director di Instituto Medico San Nicolas (ImSan) docter Joel Rajnherc, a indica cu ImSan tin hopi proyecto den planning, pero e no por revela nan ainda.
Rajnherc a menciona cu tin hopi specialista cu kier bin traha na ImSan, sea pa haci operacion of haci diagnostico y nan ta den combersacion, pero prome nan tin cu zorg pa nan papeleo via Departamento di Salud Publico, Instituto di Calidad, y eventualmente hasta via Inspeccion di Salud.
Nan mester tin tur cos na ordo prome cu firma un toelatings overeenkomst, cual ta un contrato cu ta duna e derecho pa puntra pa bin haci procedurenan na ImSan.
Dr. Rajnherc a señala cu pa tur e cosnan cu ImSan ta bay haci nan tin e espacio rekeri y aparatuur ta na su lugar caba. Ta depende di cual specialistanan kier bin na e Instituto Medico.
“Manera ta conoci nos tin 22 cama na ImSan cu no ta wordo uza suficientemente ainda, pasobra nos ta, primeramente, fiha riba pashentnan cu ta haci operacion, cu nan por yega mainta bay cas atardi. Pero mas y mas nos ta cubriendo esey”, director di ImSan a señala.
El a agrega cu den fin di siman ImSan tin varios biaha caba cu nan tabata tin problemanan agudo cu wowo, cu no por warda pa dialuna bay opera. “Nos a opera pashent hasta diasabra anochi, y tur cos a bay hopi bon. El a keda drumi diasabra y diadomingo, y dialuna a bay bek cas”, dr. Rajnherc a duna di conoce.
El a expresa cu mas y mas operacion ta bira madura, cu ImSan por ofrece un cuido mas extenso cu loke e Instituto Medico a cuminza cu ne.
“Nos tin e personal adecua tambe pero manera semper mi ta bisa, nos ta cuminza gatea, despues nos ta cuminza cana, despues nos ta cuminza core y despues nos ta haci e marathon. Pues, cada paso ta tuma su tempo, pa haya e experiencia”, director di ImSan, docter Joel Rajnherc a conclui.
