ORANJESTAD (AAN): E asina yama Fundacion Ultimo Deseo Aruba (FUDA) a divulga recien, cu e compania local Faith & Hope Medical Transport a informa nan,
cu ya nan no por combina nan trabaonan regular y otro obligacionnan, y pesey no por pone nan Ambulancenan disponibel pa yuda cumpli cu deseo di pashentnan. Pa e motibo ey, Faith & Hope a dicidi na finaliza e acuerdo di colaboracion cu Fundacion FUDA.
Pesey den ultimo periodo aki, FUDA a bin ta buscando activamente un socio nobo, y awor cu orguyo nan por anuncia cu ImSan ta disponibel pa duna nan apoyo. ImSan a laga sa, cu semper tanten cu tin suficiente personal y ora cu no tin emergencia na Aruba, nan lo pone disponibel un Ambulance cu chauffeur pa cumpli cu e (ultimo) deseo di personanan terminal of cu ta riba cama.
Ademas di esey, FUDA tin e intencion di introduci nan mesun Ambulance di deseo na Aruba na 2026. Te cu e ora ey, FUDA ta keda confia di por haci uzo di e servicionan di ImSan.
FUDA claramente ta desea di expresa nan gradicimento na e empleadonan di Faith & Hope pa nan dedicacion. Danki na nan contribucion boluntario, ya caba a logra cumpli cu cuatro deseo, cu ta sigur un contribucion balioso y inolvidabel.
Ademas di esey, Fundacion FUDA ta duna un bon bini caluroso na ImSan como socio nobo, colaborador, y ta spera cu e colaboracion lo bay ta agradabel y significante.
