ORANJESTAD (AAN): Recientemente DIARIO a tuma nota di sentencia di Huez cu a ser emiti dia 8 di November 2024, den un caso cu un importador local a entabla contra Aduana di Aruba.
E importador ta cumpra regularmente containernan, y semper ta laga e proceso di Aduana wordo haci door di un expediteur local cu ta atende cu Aduana. Entre Juni y October 2022, a importa diez container bashi cu un Douanewaarde di 1.800 Florin pa cada container. Pero despues di un control, Aduana a descubri cu e prijs di compra real pa cada container ta mas halto (3.700 Florin pa un container, y 7.000 Florin pa dos), y esey a pone cu Aduana a manda cobranza extra despues di 2.136 Florin cu no a wordo paga pa impuesto di importacion via di UTB (Uitnodigingen tot Betaling).
E importador a opone cerca Inspector di Aduana contra e cobranzanan di UTB aki, bisando cu e Douanewaarde a wordo basa riba facturanan nacional y cu mester aplica un balor fiho di 1.800 Florin pa cada container. Pero Inspector di Aduana a rechaza e bezwaar aki y a contesta cu e balor fictivo aki ta wordo aplica solamente ora cu no tin factura disponibel.
Sinembargo Huez a opina cu e transaccionan entre e Importador y e bendedor di Container tabata benta local di importadornan cu ya caba a yega di wordo importa, pues riba esaki no tin di paga impuesto di importacion. Mirando cu e containernan a wordo importa sin factura, Inspector di Aduana e ora mester a aplica e balor fiho di 1.800 Florin.
Corte a dicidi pues cu e cobranzanan UTB di Aduana a wordo haci eroneamente, y e bezwaar di e importador a wordo declara valido. Esnan cu kier lesa e caso aki (cu tur nomber di compania y Inspector kita) por bay na e website aki:
Huez a ordena pa Inspector di Aduana paga pa e gasto di e Importador cu ta na 1.400 Florin, y tambe tin di paga e griffierecht di 150 Florin paga door di e Importador.
