Pa stimula hendenan cumpra local - PHILIPSBURG: Si acaso un proposicion poni aworaki riba mesa drenta na vigor,
e ora ciudadanonan di St. Maarten cu ta cumpra mercancia online di e.o. Amazon of Alibaba, etc., lo tin di bay paga un tax di 7.5% riba e articulonan cu nan ta cumpra riba Internet.
E meta ta pa crea un tereno di wega mas husto, y stimula clientenan pa keda cumpra productonan localmente, y tambe yuda Gobierno haya algo di e ‘perdida di entrada’ aki.
Ministro di Finanzas, Ardwell Irion a elabora riba e proposicion durante un reunion den Parlamento riba reformamento di impuesto pa e pais.
Algo cu nan a nenga sigur ya caba, ta un Value Added Tax (VAT) di 12.5 porciento. Esey ya a wordo bari for di mesa.
Encuanto e idea di e 7.5% Tax, Ministro Irion a indica cu ta Fondo Monetario Internacional (IMF) a sugeri pa e pais pensa riba un sorto di impuesto di importacion pa pone riba importacionnan priva, y esey ta esun cu nan ta papiando awor di dje.
El a splica cu ora un negoshi importa un producto y ta bende esaki na consumidornan, un Turn Over Tax (TOT) di 5% ta wordo paga door di e compania riba e suma cu e articulo a wordo bendi. Pues eynan ningun cambio ta wordo proponi.
Pero ora cu un ciudadano ta cumpra productonan online, manera Amazon, tin di corda cu Amazon no ta paga e TOT di 5% aki. Esaki ta crea un competencia inhusto pa negoshinan registra na St. Maarten. Pa por crea un tereno mas husto di wega, y logra haya entrada perdi, un Tax di 7.5 porciento riba benta ta wordo proponi pa cobra di e individuonan cu haci e compranan aki.
E intencion ta pa cobra e 7.5% aki ora cu e cliente bay recoge e producto ora cu el a yega St. Maarten.
Ora un ciudadano cumpra producto di exterior, e no mester paga ni impuesto di importacion, ni sales tax riba nan. E reglanan existente pues ta stimula clientenan pa cumpra mas riba internet envez di cumpra na un comerciante local.
E proposicion di e 7.5% tax aki no ta bay wordo poni riba e TOT di 5%. Tambe a ser treci dilanti cu kizas e 7.5% aki por wordo imponi tambe riba cierto servicio.
