Ing. Jossy Kock - *Dos bes pa aña sistema di drenahe ta wordo manteni
ORANJESTAD (AAN): Director Interino di Departamento di Obranan Publico, DOW, a laga sa cu actualmente e departamento no tin mas trabaonan riba plan, ademas di esun di Noord. Esaki pa motibo cu DOW ta haci esaki den cooperacion cu e contratista y esey kiermen cu DOW siu ekiponan, su personal ta ocupa na e proyecto aki (esun di reconstruccion di e caminda entre e rotonde di Noord - Turibana).
Sinembargo, a puntra Ing. Kock con DOW ta preparando pa e temporada di yobida cual ta relata na e temporada di horcan.
Manera ta conoci, Aruba tin cierto areanan unda awa ta keda para treciendo problema pa trafico y pa e habitantenan. Den transcurso di e ultimo añanan, a traha riba esaki, pero a puntra Sr. Kock con e situacion ta na e momentonan aki.
El a indica cu dos biaha pa aña, e rooinan y e canalnan ta wordo haci limpi. Pa loke ta e riolering y e drenahenan di awacero esakinan ta wordo mantene frecuentemente. Principalmente ora cu ta drenta temporada di yobida nan ta wordo mantene prome cu e temporada yega y durante e temporada, a señala.
Kock a duna di conoce cu aworaki no a raporta ningun problema pero tin cierto camindanan cu ta identifica cu tin problema cu awa. DOW ta bezig pa soluciona e problemanan aki un pa un, a bisa.
El a agrega cu e contratista cu a traha e proyecto Watty Vos Boulevard (WVB) ta bezig cu solucionnan pa loke ta e caretera aki. Na diferente area caba nan ta bezig y ta den plan pa wordo drecha pa asina Watty Vos Boulevard no tin molester di awa. DOW ta trahando riba esaki hunto cu e contratista.
