Presidente di Parlamento Marlon Sneek:
*Espacio destina pa nan no ta wordo respeta!
ORANJESTAD (AAN) — Presidente di Parlamento, señor Marlon Sneek, a señala den entrevista cu Matutino DIARIO, cu berdad a pone espacio disponible pa Parlamentarionan staciona nan auto, y e tin su borchi.
Pero nan ta mira cu, lamentablemente, e borchi no ta wordo respeta, y gewoon otro automobilistanan ta staciona nan auto den e vaknan cu ta destina pa Parlamento, y esey ta fastioso pasobra e parlamentario mester bin traha tur dia y ora di yega no tin lugar di para nan auto, y e tin cu bay core busca un lugar pa staciona.
“E parlamentario, den e caso aki, ta paga Aruparking Authority, pa e por garantiza su espacio pa bin haci su trabao. Di parti di Parlamento, nos ta bezig cu algun cos con nos por garantiza cu e espacio aki ta keda disponible pa Parlamento, y mi ta kere cu den e dianan aki boso ta bay scucha kico ta e pasonan cu nos ta tuma”, Presidente di Parlamento a expresa pa DIARIO.
El a menciona cu como Presidente di Parlamento e ta bezig cu DOW kico por wordo haci, y despues di esey, e lo trece den e comision concerni, y di eynan ta dicidi cual ta e pasonan cu nan lo bay tuma como Parlamento, pa garantiza e espacio ey pa Parlamentarionan.
Sneek a señala cu e cambionan cu ta tumando lugar ta crea un caos, no solamente pa e parlamentarionan cu mester staciona nan auto, pero pa e trafico total dilanti Parlamento. Hunto cu DOW lo bay analiza si e cambionan aki ta conforme ley. “Den e renovacion cu a bin haya ora cu mi a bira presidente di Parlamento, no tin expansion di e Parkinglot. Loke tin ta un edificio cu ta decadente, e ta cuminza skeur, vloernan ta cuminza zak, y e idea ta traha un edificio nobo eynan, pero no a tene cuenta cu traha espacio extra pa parkeo.
