Shurman Milliard contento y orguyoso
ORANJESTAD (AAN) – Shurman Milliard, miembro di Directiva di Hunga Teca, den conferencia di prensa a expresa su satisfaccion cu Hunga Teca a celebra cinco aña di existencia. Pesey e dia aki ta hopi importante pa e Fundacion cu ta apoya y cana atras di e derechonan di mucha, tocante hungamento.
Shurman a indica cu pa cinco aña caba Hunga Teca ta dunando e servicio na muchanan cu hunto cu nan mayornan por bin y fia diferente cos pa hunga, y nan ta link esaki cu diferente desaroyo, pasobra ta importante tambe pa sa, na e momento cu e mucha ta hunga, cu e ta desaroya den nan mente, motoricamente, etc., y na Hunga Teca, pa cinco aña nan ta duna e servicio aki, y na e momentonan aki nan ta contento cu e local nobo cu nan tin.
Cinco aña pasa nan a cuminza na YMCA na San Nicolas, y na e momento aki e localidad ta na Biblioteca Nacional na Oranjestad, y nan ta hopi contento cu esaki.
Milliard a menciona cu na e momentonan aki Hunga Teca tin mas cu 250 miembro. Nan ta personanan cu ta bin fia diferente cos pa hunga hunto cu nan yiu pa desaroya y tur e trabao aki, nan ta hacie cu seis miembro di e directiva y cinco boluntario cu ta yuda den e dianan cu nan ta habri.
“Nos ta hopi orguyoso cu den e cinco añanan aki, nos por a keda crece tur dia, tur aña, pa sigui bay dilanti. Nos ta wak cu diferente actividad a bira mas grandi, e apoyo y conocemento pa siña algo ta bira mas grandi den e comunidad, y por wak cu e bishitante di Hunga Teca ta vira mas vivaz. Nos ta wak hopi bunita, un tata, un mama cu ta bin cu nan yiu, tres of cuater, dos mucha chikito te cu grandi, pasobra nos tey pa tur e diferente grupo y esey banda di diferente proyecto cu nos ta haci cu diferente partner. Den e añanan cu ta bin y pa futuro lo keda bira mas grandi”, Shurman Milliard a señala.
