DIARIO a adverti pa medidanan drastico di Gobierno Hulandes
*Cama, baño y pan” ta wordo reemplaza pa regreso pa pais
*Aruba y e grupo grandi cu ta prepara pa bandona Maracaibo
ORANJESTAD (AAN) — Ya pa varios aña, DIARIO ta opone e hecho cu Nacionnan Uni no ta duna contenido na e necesidad pa soluciona un di e problemanan mas serio na mundo, cu ta e realidad di refugiadonan.
Si Nacionnan Uni a wordo introduci como vehiculo pa paz mundial, el a bira tolerancia maximo di mundo liber y hasta bofon di dictadornan, cu tur pais liber ta condena.
Con nacionnan, paisnan cu ta consisti di hende, por uni, si e balor di hende no tin ningun importancia pa un grupo grandi di nan miembronan?
Esaki tabata e punto di bista di DIARIO den un situacion mundial, caminda paisnan democratico mester soluciona problemanan cu ta resultado di democracia, cu ta faya ora Pueblo tin problema pa uza su inteligencia na urna electoral of abuso di poder di lidernan falso, manifesta nan.
Un prueba grandi ta e realidad na Venezuela. Mundo a introduci cantidad di penalty contra Nicolas Maduro cu ainda ta riba e stul di Presidente aunke atrobe el a perde eleccion y asina ta causa un desastre social y humano na Venezuela.
Paisnan liber a wordo confronta cu creacion di un sentimento cu mundo liber mester soluciona e problemanan social cu e dictadornan ta crea, loke tabata posibel ora hopi placa a lora pero sigur despues di Covid-19 cu economia mundial a worde destrui, ya no ta visibel mas.
Kico mester bira destino di refugiadonan? E sentimento humano, cu a wordo abusa dor di malvadonan, a bira refugio pa victimanan cu a bandona nan pais debi na e situacionnan y peligernan existente.
Sinembargo, awor e paisnan mes a alcansa un punto, cu nan tin obligacion cu nan propio populacion, manera na Hulanda ta bini dilanti.
E hecho cu na Hulanda ta wordo dicidi, cu despues di un proceso adecuado, refugiadonan cu no ta cualifica pa haya e asistencia cu nan kier, mester bolbe nan pais, ta sigur un prueba palpabel cu awor den seno di Nacionnan Uni mester coy e toro na su cacho!
Entrante dia Prome di Januari personanan cu ta busca asilo politico pero segun e procedura legal no ta cualifica pa tal, no ta haya oportunidad pa sigui goza di e areglo pa nan haya “pan, baño y cama” na Hulanda.
Nan mester bolbe nan pais, manera awor a bira conoci pero por a wordo spera basta tempo pasa ora ya habitantenan mes di Hulanda, a cuminsa protesta contra nan posibilidad pa haya no solamente asistencia, pero hasta vivienda pa nan mes.
Te awor na cinco ciudad Hulandes, refugiadonan cu no ta wordo oficialmente reconoce como tal, ta haya un tipo di asistencia. Pero awor placa a caba, Gobierno Hulandes a trece dilanti.
A wordo mustra riba e problemanan social serio cu e grupo aki ta crea cu nan realidad di drumi ariba caya si nan no tin cas pa biba, por ehempel.
Pero pa Ley nan no tin derecho ariba un permiso pa biba na Hulanda y awor porta ta cera ya cu Hulanda no por paga e sumanan enorme cu e gasto aki ta encera.
E decision Hulandes ta wordo tuma na momento cu, manera DIARIO ya a relata, den porta di Aruba na Maracaibo, e problemanan politico actual y e desastre social total, ta haci cu gruponan grandi ta bandona e ciudad industrial di Venezuela.
Aruba ya ta hiba e maneho cu e no tin e capacidad pa atende cu refugiado oficialmente pero si regularmente ta wordo confronta cu personanan desespera, cu ta alcansa costa di Aruba.
Pa informantenan di DIARIO awor un pregunta ta surgi. Hulanda ta bay busca forma pa regula e entrada di personanan di nacionalidad Hulandes for di region di Caribe?
Ya for di prome cu eleccionnan a tuma lugar na Hulanda, DIARIO a adverti pa e pensamento politico na Hulanda, cu ciudadanonan di paisnan Hulandes den Caribe, mescos cu Hulandesnan cu kier biba na entre otro Aruba, mester di permiso di estadia na Hulanda.
DIARIO na e momentonan aki ta en espera di mas informacion riba e tema aki. No mester lubida, cu pa un grupo di ciudadanonan Hulandes den region di Caribe, e entrada liber y facil na Hulanda hasta ta habri caminda pa nan bishita mediconan y disfruta di cierto posibilidadnan cu nan no tin na Aruba.
E forma cu Hulanda ta cera porta pa personanan cu ta pensa cu nan mester wordo considera refugiado pero no ta honra tur exigencia, ta redobla e pensamento, cu cambio riba hopi asistencia social cu tabata posibel na Hulanda, ta wordo introduci riba termino corto!
