Uno di cada cinco infeccion ta tuma lugar entre alumnonan school basico - Cambionan pa baha gastonan di Cuido Medico mester bira parti di futuro - *40 te 100 hende den hospital situacion no ta serio pero “di preocupacion”
ORANJESTAD (AAN) — Manera DIARIO a presenta na Aruba algun dia pasa, Hulanda ta introduci dia 25 di September cambio den su medidanan contra e malesa Covid-19 y ta bandona medidanan basico cu el a tuma.
Segun autoridad riba e tereno aki a anuncia, Hulanda ta mira diferencia entre 2020 y 2021 debi na e cantidad di personanan cu ta vacuna awor.
Hulanda ta bay deshaci tambe di e regla cu ta e aumento di casonan ta determina e seriedad di e situacion y ta bay basa su mes riba e cantidad di hende den hospital pa dicidi con serio e asunto ta.
Ora papia di serio den e maneho cu Hulanda kier introduci na entrada di e temporada di fin di 2021, mester tene cuenta cu pa Hulanda ta papia di un situacion serio ora e cantidad di pashent ta 40 pa 100.
DIARIO den e proximo dianan aki ta sigui adverti Arubianonan y e pais Aruba pa medidanan cu Hulanda ta pensa di tuma riba tereno di Covid-19 cu ta bira un suavisacion grandi di medidanan.
Manera DIARIO ya a adverti, tin expertonan cu no por ta di acuerdo cu e forma cu ta deshaci entre otro di prevencion dor di duna permiso pa eventonan grandi.
Hulanda ta basa su mes completamente na e cantidad di personanan cu a vacuna, cu no ta henter e poblacion mientras expertonan mundial ainda no ta confirma na cual haltura por papia di un inmunidad publico pues di un mayoria importante di e pais.
Uno di e situacionnan mas serio na Hulanda pa loke ta trata Covid-19 ta e forma cu Covid-19 ta presenta su mes na schoolnan y na luganan cu muchanan ta keda despues di school.
Di cada cinco caso di infeccion, uno tabata di un mucha na school basico. Sinembargo, schoolnan no ta cera mas den caso di presencia di malesa cu tampoco ta ocasiona cu ta laga henter klas keda cas na momento cu resulta cu un mucha tin e malesa.
Na Hulanda tin maximal 1350 cama di Intensive Care disponibel pa atende cu Covid-19, cu for di 25 di September ta cuminsa conta cu posibilidad di cantidad di evento caminda un publico grandi por reuni pero caminda mester duna prueba cu ta vacuna.
Ta mantene regla pa laba man, no tosa den man pero den brasa, no duna otro man, pero nan ta mes dirigi ariba e deseo personal di personanan, cu na Hulanda sigur no a duna prueba di ta tene na distancia social.
Mientrastanto Aruba mester tene na consideracion tambe cu un rapport a wordo emiti den cual ta urgi Gobierno pa cuminsa atende cu e gastonan halto di Cuido Medico na Hulanda.
Kico esaki lo encera, tambe ta topico riba cual DIARIO lo sigui elabora sigur teniendo na cuenta cu na Aruba, mescos cu otro paisnan den Reino, hendenan kier keda cierto temporada na Hulanda pa haya beneficio di cierto areglonan medico cu ta desconoci na e paisnan Hulandes pafor di Europa.
E realidad ta, cu Gobierno mes ta admiti cu tin un grupo cu no a vacuna na Hulanda y ta mantene e posibilidad pa infeccion di Covid-19, cu lo conoce menos medida preventivo for di 25 di September 2021 mientras e trafico di hende entre Hulanda y Aruba ta sigui aumenta.
