Parlamentario Shailiny Tromp-Lee: *E tempo cu Aruba tin ta hopi cortico!
ORANJESTAD (AAN) – Otro aspecto hopi importante cu Parlamentario Shailiny Tromp-Lee a trece dilanti, ta e parti di contenido di e Consensus Rijkswet, y un asunto cu fraccion di MEP lo bay duna hopi atencion, ta e parti di RAft, unda nan ta bay duna e stipulacion di reglanan cu Aruba tin cu cumpli cune, na nivel presupuestario.
Fraccion di MEP lo pone enfasis riba e hecho cu mester ta realistico y tambe alcanzable, pasobra enberdad den e fechanan stipula, Aruba como pais mester por cumpli cune, Tromp-Lee a señala.
“Y no cu di awor caba, sabiendo cu nos no lo cumpli ta pone y hancr'e den un ley cu tin cu keda aproba. Esakinan ta bay ta puntonan cu nos ta bay duna atencion y mi ta kere cu nos ta bay tin dianan hopi druk”, Tromp-Lee a indica.
El a reitera cu fraccion di MEP ta tratando e leynan aki seriamente, reunionnan interno ta tumando lugar, y poco, poco lo informa pueblo riba e punto cu su fraccion ta bay fiha riba dje, pero ta bay yega momento cu Parlamento di Aruba ta bay fiha kico ta e puntonan cu nan ta bay traha riba nan, pa loke ta trata posible cambio of amiendanan cu nan lo presenta un bez cu e leynan aki wordo trata.
“Mi ta finaliza bisando cu e informacionnan cu nos a haya di parti di Hulanda ta, cu nan kier trata ambos ley, prome cu summer recess, cu ta na inicio di Juli di e aña aki, kiermen e periodo cu nos tin pa trata e leynan aki y e proceso cu nos tin pa analiza, haci pregunta y traha riba posible amiendanan, ta hopi, pero hopi, cortico” Parlamentario Shailiny Tromp-Lee a subraya.
