MADRID: E ex-hefe di e Direccion di ContraInteligencia Militar (Dgcim) durante gobierno di Hugo Chavez, esta Hugo ‘El Pollo’ Carvajal,
a declara na Polisnan di Spaña cu a detene, cu tur e tempo ey cu e tabata scondi pa Husticia, nunca el a sali di Spaña y e tabata cambia di piso cada tres luna.
E corant ABC na Madrid, a bisa cu toch tabatin un excepcion: E vivienda di Calle Torrelaguna unda el a wordo haya. “MI a keda ocho luna riba piso. Esey tabata mi eror.”
Pero un razzia y un operacion conhunto entre Polis di Spaña y Drug Enforcement Administration (DEA) di Merca, a pone un fin na su fuga di 1 aña y 10 luna. Justice Department di Merca kier haya Carvajal pa hiba dilanti Corte pa delitonan di narcotrafico, pero El Pollo ta resisti e extradiccion. Pesey mes el a core sconde ora cu el a haya sa cu Corte di Audiencia Nacional a bay di acuerdo pa extradit’e pa Merca.
E anochi ey, ora cu agentenan a benta e porta abao di e piso unda e tabata scondi, el a bay sconde den e ultimo camber di e vivienda, cu un cuchiu den man. E agentenan a tarda algun seconde, y a keda pasa revisa camber-pa-camber, te ora cu nan a topa cune.
Scondi y cu yudanza: Awor cu e ta deteni ya el a ricibi bishita di su abogadonan. Nan ta purba di keha cu e haci un detencion ilegal, aunke nan sa cu tin un ordo di extradiccion caba y pendiente pa wordo ehecuta.
Carvajal a keda trankil, y a duna splicacion breve di su escondite. Tabatin hopi cambio, hopi disfraz, sero contacto fisico cu esnan di dje mes durante tur e tempo ey.
Hecho ta cu e persona cu tin e piso ey ta huur, un muher Venezolano, tabata e unico contacto cu e tabatin cu exterior. E dama tabata biba eynan mes, y ta dune cuminda y lo necesario pa dia pa dia. E dama no tabatey ora cu autoridadnan a tene razzia na e edificio.
No tabata facil pa a localiza unda e ta keda, segun e corant ABC a splica di fuentenan cu sa algo di e razzia. Durante tur e tempo ey, cu un constante intercambio di informacion, tabata vigila varios cas unda nan ta sospecha cu e por ta scondi, pero no tabatin nada na su nomber den henter Spaña.
Cu Merca a pone un prijs di 10 miyon Dollar pa cualkier tip di oro pa haya su paradero, a complica e situacion, pasobra nan tabata haya tip cu El Pollo ta scondi na Galicia, na Andorra, na Salamanca, na Valencia, cada uno tin di wordo investiga.
E tip definitivo: Esun aki a bin for di DEA mes na luna di Juni cu a pasa. Nan a localiza Hugo Carvajal den Calle Arturo Soria na Madrid y ta bibando cu un Venezolana, y nan a identifik’e cu nomber y fam. Pero ta trata aki di un di e cayanan mas largo di Madrid, y atrobe no tabatin nada registra na su nomber.
Tabata apenas algun siman cu despues porfin a haya un adres exacto. Nan a haya sa cu e muher ta bibando ta paga huur den un edificio residencial di 10 piso cerca di Calle Torrelaguna. Pero vigilancianan no tabata produci conlusion, pasobra nunca a mire sali ni drenta e edificio, ni yega y para na bentana. Pero a pensa cu si acaso e haci esey, e lo ta disfraza of kizas a cambia su apariencia cu cirugia.
