ORANJESTAD (AAN): Un di e weganan di mas popular di Lotto, keto bay ta Zodiac.
Aki bo ta escoge un number consistiendo di cuatro cifra, y ta agrega un signo zodiacal na dje. Y ya bo ta den wega.
Esey ta loke Hubert a haci tambe, y el a bira contento ora el a mira cu su number y e signo a sali.
Pesey mes riba Diamars el a acudi na oficina di Lotto na Playa pa reclama su premio. Aki mesora e empleadonan a scan e barcode di e ticket, y e computer a confirma cu el a gana 25.000 Florin cu e wega di Zodiac Merdia.
Asina a cuminza cu e proceso pa transferi e premio electronicamente pa su cuenta di banco. Hubert a indica cu e ticket ganador el a cumpra na JR2 Lottery and Snack.
