ORANJESTAD (AAN): E siman aki, un delegacion di Aruba ta presente na e isla di St. Eustatius pa atende Conferencia di e Alianza DCALFA cu ta fortifica agricultura, cria y pesca na e seis islanan di Caribe Hulandes.
E delegacion di Aruba riba Dialuna, a bishita diferente area di St. Eustatius pa mira progreso den agricultura, y uno di nan tabata na Golden Rock Hotel.
A resulta cu e Hotel aki a construi riba su tereno, un greenhouse cu produccion di diferente matanan herbal y di berdura. Gerencia di e Hotel a haci esaki, pasobra via di nan propio greenhouse, ta logrando e meta pa nan produci tur producto fresco pa nan propio Restaurantnan. Pues nan tin nan mesun berdura y specerij fresco.
Esaki ta duna espacio na e Cunukeronan di e isla pa por ofrece mas producto fresco na e comunidad di e isla. Nan ta colecta tur awa di yobida via goot y esaki ta worde reusa pa iriga e mata nan den e greenhouse.
Loke Golden Rock Hotel ta haciendo, sigur un idea pa Hotelnan na Aruba tambe considera. Aunke den pasado, DIARIO a publica relato di un All Inclusive Hotel na Palm Beach cu a aparta un pida tereno riba nan propiedad pa bay cultiva mata di lamunchi, cu lo wordo usa pa nan Bar y Restaurantnan. Pero e idea no a sigui.
