ORANJESTAD (AAN): Recien e asina yama “Best of the Best Travelers’ Choice Awards” di Tripadvisor a sali y Bucuti & Tara Beach Resort ta
continua reinando na Aruba, den Caribe y na mundo como un di e miho hotelnan. E plataforma online mas grandi na mundo di reporte di biahe a premia Bucuti & Tara Beach Resort ‘back-to-back’ como e No. 21 Best Hotel in the World y No. 3 Best Hotel in the Caribbean.
Bucuti & Tara ta e unico hotel na Aruba pa logra drenta den e Top 25 Miho Hotelnan na Mundo.
Pa e viahero cu ta balora e elogio mas halto (di boca pa boca), Tripadvisor ta lo maximo di confiabilidad, di e mesun biahantenan cu a bishita e hotel, a come na un restaurant, o tabatin otro experiencia di biahe. E opinionnan ta di berdadero biahante di tur parti di mundo, compartiendo opinion y storia berdadero... e conexion y conseho exacto cu hende ta conta ariba.
E titulo Travelers’ Choice Awards Best of the Best ta celebra e nivel mas halto di excelencia den biahe. E ta ser otorga na esnan cu ta ricibi un volumen halto di reporte y opinion sobresaliente di e comunidad di Tripadvisor durante un periodo di 12 luna. Tin mas di 1.6 miyon hotel registra na Tripadvisor. For di Tripadvisor su registro general di ocho miyon, menos cu 1% ta alcansa e logro aki.
