Parlamentario Darlaine Guedez-Erasmus (MEP):
ORANJESTAD (AAN): Den reunion publico di dia 24 november 2022 den sala di Parlamento di Aruba, Minister Dangui Oduber tabata presente pa asina trata e presupuesto pa aña 2022 di e Tourism Product Enhancement Fund (TPEF).
TPEF ta un fondo estableci pa eleva e producto turistico Aruba. Tin diferente proyectonan y den diferente fase cu a bini dilanti den e presupuesto aki. Entre otro, proyecto di Baby Beach, Rodgers Beach, y Hooiberg. Hooiberg ta den fase 2 y lo drecha e gazebonan, pone un mirado na e top di e sero, drecha e trapinan cu Mosaic pa asina ilustra e historia di Hooiberg.
Durante e reunion publico nr. 8 yama dia 24 di november 2022 mi persona a entrega un mocion tocante e proyecto di Hooiberg, caminda ta urgi gobierno pa construi un man di sosten. Di e manera aki nos local- y turistanan adulto mayor lo por sigui subi e sero di Hooiberg y otronan por subi cu mas confiansa. Pakico esaki ta importante? Paso Hooiberg ta un atraccion turistico, pero tambe un luga pa keda haci actividad fisico.
Un otro punto mi a urgi gobierno pa ehecuta ta un pad pa e personanan cu mobilidad limita pa asina nan por tin acceso na e gazebo mas abou. Di e forma aki tur persona por participa y disfruta di e naturalesa na e sero di Hooiberg, sea ta local of persona cu ta bishita Aruba.
E bon di e proyectonan aki tambe ta e enfoke riba e luganan turistico central di nos isla. Si por mira e proyecto anker di cas Ariba cu tambe ta trahando duro riba dje, tur e proyectonan aki sigur lo yuda e negoshinan cu ta keda mas paden. E negoshinan aki tambe lo por beneficia di e compra di e turistanan cu ta bini pa inverti.
Mi ta gradici coleganan di parlamento pa sostene mi mocion y mi ta spera di pronto mira esaki ehecuta na Hooiberg, Parlamentario Guedez-Erasmus a indica.
