PEREIRA: Un caso cu a laga hopi Colombiano keda disgusta y tambe rabia, a wordo registra den fin di siman cu a pasa.
Esaki a socede den pueblo di Volcanes den municipio di Santa Rosa de Cabal, na departamento di Risaralda na Colombia, y a laga habitantenan keda den shock.
Un homber identifica como Johan Robert Espinosa Garcia a mata su cacho ‘Blacky’ y despues a trata di cushin’e, pero a wordo gara cu man den mansa door di Polis y oficialnan di Secretaria di Gobierno di e municipio.
A bin sali na cla, cu e tata di Espinosa Garcia a denuncia na Polis loke ta pasando e momento ey na su finca, y el a agrega cu algun dia pasa el a mira un situacion similar cu otro cacho di 2 luna bieu.
Secretario di Gobierno di e lugar, Harold Velez, a confirma na prensa cu autoridadnan a yega te na e finca y a bin topa cu e homber aki den un sala cu e cacho sin cuero, faltando dos pata, y e tabata net cla pa bay pone e carni riba candela.
“Nos a bay eynan cu oficialnan di Bienestar di Animal, y tambe cu Polis pa verifica loke ta pasando, y e tabatin tur cos cla pa bay cushina e cacho, cu tur su specerij y sauce cla, pa bay come,” el a bisa.
E homber a wordo gara door di Polis, y Fiscal a duna ordo pa e keda cera, y a informa cu ta bay acuse di delito di maltrato di animal, cu segun ley por duna un castigo di entre 12 y 36 luna di prison.
Pero Huez cu ya caba a atende e caso, a dicidi cu esaki no ta un acto castigable, y el a pone e homber den libertad.
Ora cu e Secretario di Gobierno, Harold Velez, a tende cu Huez a laga e homber liber, el a expresa su disgusto cu e decision aki, pasobra e no a ni ordena e homber pa e bay un Centro di Rehabilitacion, sino cu el a djis lage cana bek liber riba caya, siendo cu tur cos ta mustra cu e persona aki lo mester haya yudanza sicologico.
E funcionario a agrega cu aunke nan ta respeta decisionnan di Huez, toch tin algun sentencia cu nan ta duna cu ta afecta henter comunidad, y den e caso aki nan lo bay sigui di keda pendiente di e homber aki, pasobra e ta parce di ta un hende cu problema mental, pa asina percura pa e no sigui comete e hechonan aki.
Polis a bisa, cu e ruman muher di Espinosa Garcia a confirma cu esaki no ta prome biaha cu e ta mata y come un cacho. Algun dia pasa el a haci esey caba, y nan tur a hala atencion. Pero e no ta preocupa cu loke su famia ta bise. Pues awor nan no sa ta cuanto biaha el a yega di haci esey caba.
Nan sa si cu e ta un usador di droga, y cu e ta biba na e finca den e pueblo. E ta ricibi remedi tambe pa un malesa, pero tin indicacion cu tin biaha e no ta bebe e remedinan.
Fiscal mientras tanto a apela e decision di Huez, y ta spera cu den simannan venidero lo por haya sa kico un otro Huez lo dicidi den e caso aki.
Hecho ta cu awor ta tur e bisiñanan den e bario awor ta bay keda vigilante y a laga sa cu nan lo yama Polis asina cu nan detecta algo. Tambe a bira conoci cu algun tempo pasa ta varios ciudadano a raporta cu nan a perde nan mascota den e sector, y nan tabata sospecha cu e homber aki tin di haber, y awor esaki a keda comproba.
