Pesadiya pa haya camber urgente pa como 172 pasahero...
- Tres persona a bira malo cu e holor aki den e Boeing 737 Max 8
ORANJESTAD (AAN): Un emergencia a presenta su mes cu un avion na Aeropuerto Internacional Reina Beatrix net bispo di Aña, cu tabata preparando pa bay rumbo Miami, esta vuelo AA-1028.
E avion a yega como 1 ora prome for di Miami, y a ateriza na Aruba pa 4:10 pm, y e vuelo di regreso tabata planea pa lanta pa 5:25 pm bek pa Miami.
Ta trata aki di un Boeing 737-Max 8 cu ta un di esnan mas nobo, y cu tabata preparando pa sali cu vuelo di AA-1028 cu ta e tradicional vuelo for di Aruba pa Miami. Sinembargo personal di cabina a cuminsa haya holor di algo kimando, parecido na ora cu plastico ta kimando of ta smelt.
Personal di cabina ta reconoce e holor aki como ‘electrical smell’, y ta bin ora cu un waya sea ta demasiado sobre-carga y e ta bira cayente y e isolador di rubber rond di e waya ta cuminsa kima of smelt. E biaha aki e situacion a empeora, como cu tin 3 hende abordo cu a cuminsa sinti nan curpa malo despues di a inhala esaki.
E posibilidad cu e ta un holor procedente di material toxico, a pone cu a notifica e controladornan pa bati alarma, y asina tanto Cuerpo di Bombero a mobilisa, hunto cu nan Comandante pa e avion, y tambe a pidi Ambulans bin eynan. Unidad di Rapid Responder hunto cu 2 unidad di Ambulans a drenta via e porta di Aeropuerto, y cu escolta di Airport Security a yega te na e avion pa atende esnan cu a bira malo, y posiblemente hiba nan Hospital. Tin indicacion cu 3 hende a bira malo abordo, incluyendo un personal di cabina (‘stewardess’).
Debi na tur esaki, e Capitan a declara cu e vuelo ta cancela, como cu el a declara e avion como ‘AOG’, esta ‘Aircraft on Ground’. Ora algo asina pasa, tin di bay revisa full e sistema pa asina haya sa e origen di e holor. Esey nifica cu e avion lo no por bula e resto di atardi ni anochi. E personal di cabina basa na Miami, tambe a pasa anochi e ora na Aruba.
Casonan similar den pasado: Tirando bista riba casonan similar, tabata na Juli 2023 cu un Boeing 737 Max 8 di American Airlines bulando for di Miami pa Chicago O’Hare International Airport, mester a haci aterizahe di emergencia na Charlotte (North Carolina) ora cu personal di cabina a detecta holor di algo kimando. E avion aki a regresa bek den servicio, como 19 ora despues. Otro caso registra tabata na October 2022 cu tripulantenan di un otro Boeing 737 Max 8 di Southwest Airlines tambe a detecta holor di plastico kimando. Nan ta referi esaki na ‘electrical smell’.
Ora esaki socede, capitan ta declara e avion como “AOG”, y tin di wordo revisa completamente door di ingenieronan di e aerolinea pa purba detecta kico tabata smelt of kimando abordo prome cu e avion por lanta vuelo bek.
Problema pa haya Hotel: Como cu e vuelo a wordo cancela, mas cu claro e turistanan cu tabata prepara pa bay bek nan pais y yega aya prome cu Cambio di Aña, lo tin di pasa un anochi mas na Aruba. Pero como cu ta New Year’s Eve riba e isla y Hotelnan ta casi full na capacidad, el a bira un trabao logistico enorme di personal di American Airlines cu e momento ey a bay sinta na telefon, y contact delaster un Hotelnan na Aruba pa mira unda por haya camber disponible.
E Boeing 737 Max 8 tin 16 asiento di Business Class, 24 asiento di Economy Comfort Class, y 132 asiento di Economy Class. Pues un total di 172 pasahero. Excepto e pasaheronan residente, tin di busca hotel pa tur di nan. Como cu e vuelo a wordo posponi y poni cu e fecha nobo di Dialuna 1 Januari 2024 merdia pa 12:20 pm.
Y mayoria Hotel tabatin e mesun contesta: “We are full”. A cuminsa hasta check resortnan All-Inclusive pa mira si tin espacio. Aki-aya a haya algun hotel cu 3 camber disponible, otro tin 5 camber.
Cu hopi perseverancia, e empleadonan di American Airlines a logra haya hospedahe pa tur e huespednan aki, cu a logra pasa un anochi extra na Aruba, y a logra bey bek Dialuna mainta pa Aeropuerto. Nan vuelo pa Miami a lanta vuelo pa 12:35 pm y nan a yega sano y salvo na Miami pa 3:55 pm.
Otro situacion mesun atardi: Poco prome cu esaki a socede, tabatin un situacion tambe cu un Boeing 757-200 di Delta Airlines cu mester a sali pa Atlanta. E vuelo DAL-9887 tabatin un retraso cu dado momento a empeora, ora cu e avion aki ya a bandona Gate pa 4:40 pm ora cu ya e tabata mas di 2 ora y 10 minuut laat.
Sinembargo ora cu e avion aki tabata riba taxiway preparando pa bay subi pista, e capitan a pidi Toren di Control pa nan regresa bek debi na un situacion cu a presenta. E avion mester a bay te na comienso di pista, y aki core bek pa yega plataforma pa asina check e situacion. E pasaheronan a keda den avion.
Finalmente te 5:50 pm e avion a lanta vuelo for di Aruba, despues di un retraso di como 3 ora y 20 minuut. Na Atlanta envez di yega 5:22 pm, el a ateriza te 8:35 pm, pues 3 ora atrasa. Posibilidad ta grandi cu hopi pasahero a perde nan vuelo di conexion na e hub di Atlanta, y lo mester a pasa Cambio di Aña sea den Aeropuerto of na un Hotel.
