Tambe riba reglanan di procedimento penal
ORANJESTAD (AAN): Recientemente, tanto Procurador General di Aruba, Procurador General di Curaçao, St. Maarten, y di Bonaire, St. Eustatius y Saba, hunto cu President di Hof Comun di Husticia, a firma un acuerdo. E pacto aki ta marca un momento historico, unda pa prome biaha Hof a yega na acuerdonan di trabao cu ambos Ministerio Publico. E ultimo acuerdo a wordo firma e tempo aya cu solamente Ministerio Publico di Curaçao, di St. Maarten, y di Bonaire, St. Eustatius y Saba. Pero awor Ministerio Publico di Aruba tambe ta forma parti di e acuerdonan aki.
E acuerdo ta establece algun palabracion riba un metodo di trabao uniforme pa tratamento casonan penal y e capacidad di audiencia na cada branch di Hof. E palabracionnan di trabao a wordo detaya den e reglamento di Procedimentonan Penal, cu tambe a wordo firma y acorda door di e partidonan. E acuerdo y e reglamentonan di proceso penal a drenta oficialmente na vigor riba 1 September 2024.
Particularmente, e acuerdo ta dirigi su mes riba palabracionnan riba e oferta di casonan na tur branch di Hof, y lo wordo stipula cada aña. E firma di e acuerdo aki ta marca un otro etapa importante, no djis pasobra esun anterior ta uno cu ta data di hopi aña pasa sino tambe pasobra, pa prome biaha e acuerdo ta wordo flankea pa un reglamento di procedimento penal. Awor cu a crea e reglamentonan aki di e strafprocesreglement, e ta bay complementa e reglamentonan ya existente, tanto di casonan civil y di ley administrativo.
E reglanan di procedimento penal ta busca pa trece uniformidad den e forma cu ta trata casonan civil door di Cortenan, door di Hof, y door di Ministerio Publico, tanto den Corte di Prome Instancia, y tambe Corte Superior. Den casonan necesario, e reglamento ta ofrece espacio den adaptacion pa haci husticia den situacionnan local specifico.
E reglamento ta dirigi tambe pa bay mehora diferente proceso, manera e planificacion y designacion, trahamento di dossier, y e tramitacion administrativo despues cu sentencia wordo duna. Un meta importante di e reglamento, ta pa contribui na reduci e largura di casonan penal. Lectornan di DIARIO cu kier download e Reglamento di Procedimentonan Penal por check e website aki:
E reglamento ta dispone di un procedimento pa desaroyo y mehoramento, y dentro di poco lo wordo adapta na e Codigo Penal nobo cu ya caba na Aruba a wordo introduci. Riba e potret por mira momento cu ta firmando.
