ORANJESTAD (AAN): Siman pasa, Hilton Aruba Caribbean Resort & Casino a conmemora Dia Internacional di Hende Muhe por medio di celebra algun di nan miembronan di team femenino, y tambe entrepreneurship femenino.
Riba e dia special aki, tur 170 hende muhe miembro di e team di e resort a worde invita pa un atardi di brindis na Laguna Lounge pa celebra Dia Internacional Di Hende Muhe y nan mesun logronan personal.
E resort a honra Nephtaly Croes, Marilu Erasmus, kende a logra certificacion den Lead 3.1 y Lead 2.1 respectivamente. E programa Lead ta enfatisa riba desaroyo di liderazgo y ta worde ofreci pa Hilton pa stimula liderazgo na tur nivel. Blanca Ortiz, y Antonia Fajardo tambe a worde honra pa completa nan programanan di aprendisahe.
Ta importante pa subraya cu Nephtaly ta e motor tras di e departamento di Ingenieria, e ta supervisa un crew di 27 electricien, carpinte y pintornan, tambe encarga pa mantene espacionan publico di Hilton Aruba den bon condicion pa nos bishitantenan.
Nephtaly ta demostra liderazgo ehemplar, cu tremendo skills den organizacion, y tambe manera un hende muhe, hopi orguyoso di por lidera su departamento.
Blanca Ortiz y Antonia Fajardo tambe a worde reconoci pa completa nan Apprenticeship Program como Certified Cook. Pa celebra nan graduacion, e talentoso chef femeninonan aki a sorprende tur bishitante na Sunset Grille cu un complimentary shrimp cocktail como Amuse-Bouche.
E hotel ta sumamente orguyoso di tur e tempo y esfuerso cu Blanca y Antonia a pone den e programa aki di 3 aña. Nan ta bisa cu no tabata facil pa balansa trabao, famia y academia pero e deseo fuerte pa por yega na e diploma tabata locual a motiva nan pa sigui bay p’e.
“Mi nieto di 15 aña a bisa cu e tabata hopi orguyoso di su oma pa por a haya su diploma y esaki ta pone mi sinti cu tur cos tabata echt bale la pena.” Sunset Grille y Mira Solo Bar a presenta dos biña crea pa creadornan di biña femenino.
Nacionnan Uni a reconoce 8 di Maart como Dia Internacional di Hende Muhe pa prome biaha na 1975, y awe e ta worde conmemora rond mundo.
