Directie Natuur en Mileu:
ORANJESTAD (AAN): For di Directie Natuur en Mileu a haya informacion hopi interesante tocante pegapega.
E 𝐩𝐞𝐠𝐚𝐩𝐞𝐠𝐚 (𝒫𝒽𝓎𝓁𝓁𝑜𝒹𝒶𝒸𝓉𝓎𝓁𝓊𝓈 𝒿𝓊𝓁𝒾𝑒𝓃𝒾) ta endemico di Aruba y ta conoci na Ingles como e ‘Aruba Leaf-toed gecko’. E ta haya su nomber debi cu su tenchinan ora ta gespan por wak un patronchi cu ta parce un blachi mata of forma di e letra v.
Y e palabra pegapega ta paso e especie aki ta cana pega pega ariba muraya ora di subi of baha. E sorto aki ta crece entre 10 cu 12 centimeter. E tin hopi parecido na e 𝘗𝘩𝘺𝘭𝘭𝘰𝘥𝘢𝘤𝘵𝘺𝘭𝘶𝘴 𝘔𝘢𝘳𝘵𝘪𝘯𝘪, nan ta diferencia na e patronchi di liñanan cu ta core dwars riba su curpa.
Di cabes te cu su rabo tin liñanan preto riba su curpa bruin cla of shinishi scur. Aunke cu nan color por varia tambe entre bruin scur, geel scur te oraño. Su cuero ta grof manera cu e tin bobbels chikito chikito (bolobonchi).
Color di wowo di e pegapega ta poco cla y su pupil ta core vertical. Nan ta come insecto y sangura, p’esey nan ta sortonan util den nos medio ambiente.
Nan ta move mas tanto anochi y ta sconde tras di cashi of luznan pa nan por come insectonan. Hende ta esnan cu ta cabando cu e poblacion di pegapega. P’esey no ta consehabel pa mata of uza productonan kimico riba nan. Por uza tacticanan pa core cu e bestia si no ta desea esaki na cas.
