ORANJESTAD (AAN): Guardian Group Fatum, e compania di seguro mas grandi den Caribe Hulandes,
ta contento pa un biaha mas ta e orguyoso patrocinado principal di Regatta di Boneiro 2024. E aña aki, e compania di seguro ta celebra su 120 aniversario, cu e tema “Going the XMile - pa sigura bo smile”. Den colaboracion cu Tourism Corporation Bonaire, ta un honor pa sostene e evento aki pa Boneiro y pa publico.
Regatta di Boneiro no ta simplemente un competencia di boto di bela; ta un evento hopi keri y ademas un di e celebracion nan cultural di mas grandi y mas bishita di e isla cu ta trece comunidad hunto. Regatta di Boneiro ta un evento cu ta honra e historia maritimo unico di e isla y ta atrae no solamente botonan di bela local pero tambe participante internacional.
Pa 120 aña Guardian Group Fatum ta compromete na ofrece servicio excelente y pone su cliente central, cu e meta pa surpasa expectativa. Bayendo e extra mile, e compania di seguro ta subraya su compromiso na brinda calidad halto, duna confianza y satisfaccion na cliente. E comunidad di Boneiro ta hunga un rol crucial den esaki paso sin nan sosten y confianza esaki lo no ta posibel. Sosteniendo e Regatta di Boneiro e aña aki atrobe, e compania di seguro kier enrikece e experiencia pa tur presente y garantisa continuacion di e tradicion rico di e isla.
“Regatta di Boneiro no ta solamente fortalece e union di comunidad pero tambe ta stimula e economia local cu un cantidad di turistay participante,” segun director di e compania di seguro, sr. Diego Fränkel. “Nos ta contento y orguyoso di traha hunto cu TCB y inverti den Regatta di Boneiro. Asina nos ta contribui na fortalece e economia local y na desaroyo sostenibel di e isla y ta bay 'e XMile pa sigura e smile' di e comunidad den Caribe Hulandes cu a pone su confianza den nos durante nan 120 aña.”
Mientras Guardian Group Fatum ta celebra su 120 aniversario, e compania di seguro ta reafirma su compromiso pa sostene comunidad. Guardian Group Fatum ta invita henter comunidad di Boneiro, Curaçao y Aruba pa bishita Regatta di Boneiro 2024 pa competencia nan di boto di bela excitante, festividad nan agradabel y momentonan inolvidabel.
