ORANJESTAD (AAN): Den combersacionnan tocante patrimonio y museo den e area Caribense,
tin atencion creciente pa artefactonan cultural, cu den e epoca colonial, a bay cune sin permit. E ministernan di e consulta ministerial di cuater pais pa Cultura y Enseñansa, pa e motibo ey a dicidi di lanta un grupo di trabou di coleccionnan procedente di contexto colonial. Asin’aki museonan y otro instancianan patrimonial den e area Caribense tin mas influencia riba con ta anda cu e coleccionnan aki, cu tin colaboracion igual como punto di salida.
E prome encuentro fisico a tuma luga na Saba Heritage Center y Eugenius Johnson Center na Saba. E sesionnan a enfoca riba diseño di e liñanan principal y atencion pa e conseho na e consulta ministerial di cuater pais na november 2026. Topiconan central al respecto tabata maneho y preservacion di coleccion, digitalisacion, infrastructura resistente contra clima, compromiso social y colaboracion den Reino y region.
Saba, e isla mas chikito di Reino, a resulta un luga excelente pa e encuentro aki. Por ehempel, e grupo di trabou a haci un paseo educativo banda di diferente sitio historico importante na The Bottom, bou di guia di e antropologo Sabano, Dimetri Whitfield. Tambe e grupo di trabou a bishita e dos museonan riba e isla: Major Osmar Simmons Museum y Harry L. Johnson Museum.
En bista di e proximo Consulta ministerial di Cuater Pais, e grupo di trabou ta preparando un conseho tocante dunamento bek di artefactonan cultural y maneho di coleccionnan di museo. Pa e trayecto aki a scoge conscientemente pa un structura renoba: e grupo di trabou ta consisti di un mescla di funcionarionan riba tereno di maneho y expertonan riba tereno di patrimonio y museo di tanto e area Caribense, como Hulanda Europeo. Ademas ministerio di Enseñansa, Cultura y Ciencia, a pidi oficina di conseho, Scriptis, dirigi pa Ludmila Duncan, pa diseña y prepara e conseho aki den colaboracion cu e grupo di trabou.
Participantenan di e grupo di trabou ta representantenan di gobierno y expertonan di tur e seis islanan Caribense y di Hulanda: Aruba (Raymundo Dijkhoff), Boneiro (Daudi Cijntje y Ziran Chin-On), Corsou (Irelnety Copra y Dyonna Bennett), Sint Maarten (Koert Kerkhoff), Saba (Shaigan Marten y Sharifa Balfour), Sint Eustatius (Sjahaira Fleming) y Hulanda (Robert Verhoogt y Remco Vermeulen). A base di nan experiencia y conocemento pa loke ta trata e temanan relevante pa e grupo di trabou aki, Arminda Franken-Ruiz y Raimie Richardson ta fungi como consehero externo.
