Jessy Ras, Coordinadora a indica:
ORANJESTAD (AAN)— E grupo 17 di Formacion Social (STV) a caba nan siman di Examen, di cual di 19 hoben, 13 a finaliza cu exito.
E coordinadora di SVT, Jessica Ras, den entrevista cu DIARIO, a indica cu asina tambe nan ta finaliza e prome fase di e trayecto, nan a haya nan barete y na final di luna di Juni nan certificado lo wordo otorga.
Esaki tabata un momento masha bunita, unda nan a haci nan esfuerzo, nan a push nan mes aunke e no tabata facil. Jessica a expresa cu e ta sumamente orguyoso di e hobennan aki cu nan logro.
E trayecto ta sigui y despues cu nan haya nan certificado lo haci diferente curso y ta bay core stage 3 biaha pa siman, y tur diaranzon nan lo ta na caserne. Asina cu Juli habri nan lo cuminza cu diferente tayer di trabao, por ehemplo for di CEDEHM, Telefon pa Hubentud, y diferente otro instancia cu lo duna nan motivacion y tayer di trabao, pa despues nan bay cu dos siman di vacacion bon mereci, y ora Augustus habri nan lo cuminza cu stage.
Jessica Ras a elabora en corto tocante e hobennan cu a cay afo. El bisa cu e mayornan ta purba trece nan pa e Trayecto, pero e hobennan mes no ta haya cu esaki ta importante y no obstante cu nan ta wordo motiva nan ta dicidi di bay cas, tambe tin motibo medico cu tin cu no por a sigui, y hobennan cu kier bay traha pa haya un tiki mas salario, of kier bay scol bek. Pues tin diferente motivo cu algun hoben a cay afo di e proyecto. Ya caba e Trayecto ta preparando caba pa STV-3 damas, cu ainda tin inscripcion. E ta pa mucha muher entre 17 te 25 aña.
{gallery}Grupo 17 di Formacion Social (STV){/gallery}
