Cifranan ta revela crecemento sostenibel den Turismo Arubiano
ORANJESTAD (AAN): Recientemente a gradua 9 cursista cu a participa den e programa di 'Vacation Rental Professional Management Training'.
E industria di turismo di Aruba ta desaroyando na un manera acelera y e cambio den necesidad di consumidor ta evidente.
Cifranan recien for di un estudio conduci door di Aruba Tourism Authority ta indica cu Aruba tin un total di 3,748 unidad activo di 'Short Term Vacation Rental', acomodando un total di 17,321 persona.
Den 2023, cifranan a indica un entrada total for di januari te cu December 2023 tabata USD 217.223,871 pa cu e industria di Vacation Rental.
Compara cu 2022, cu tabata tin un entrada di USD 152,748,711 ta indicacion di un aumento consistente, indicando un demanda fuerte for di mercado.
Impact Hub Aruba, un fundacion dedica na apoya ‘entrepreneurship’ y innovacion na Aruba, ta stimula diversificacion pa un crecemento economico sostenibel di nos isla. Acelerando desaroyo profesional y personal como meta, Impact Hub ta desaroya conhuntamente cu partnernan diferente programa segun modelonan global pa asina fortifica conocimento y emprendimento na un manera profesional y duradero.
Den luna di Januari, Impact Hub hunto cu Blue Aruba Rentals, a uni forza pa asina presenta un programa di 'Vacation Rental Management Training' pa profesionalnan ya caba den e industria of aspirantenan.
Blue Aruba Rentals, un di e lidernan mas grandi di e industria di 'Vacation Rental Management' na Aruba, a comparti nan experticio cu participantenan, aportando na un base di conocemento amplio y actualisa, pa asina yuda mehora e calidad di servicio y eficiencia den e sector di 'Vacation Rental'.
Impact Hub Aruba ta felicita tur graduado y ta gradici e team completo di Blue Aruba Rentals pa nan contribucion y dedicacion.
Esaki ta un paso importante pa nos industria turistico y ta demostra e compromiso di comunidad na sigui desaroya y fortifica e oferta turistico.
Pa tur esnan cu a gradua, ta desea nan exito den nan carera y ta confia cu nan lo sigui contribui na e crecemento continuo di nos isla.
