ORANJESTAD (AAN) – Den conferencia di prensa di gobierno, Dialuna 1 di November awo, Prome Minister mr. Evelyn Wever-Croes a referi tambe na “CAft y e sosten di likidez”, con nan ta mira cu Aruba ta bayendo y pakico nan ta opina cu nos pais no mester di e sosten di likidez mas.
“Nos ta na mesa ainda pa locual ta e sosten di likidez di e di cuater cuartal di e aña aki. Nos no ta cla ainda, manera tur hende por a scucha di CAft, Diabierna, den nan conferencia di prensa.
Nos no a haya e sosten di likidez ainda. Nos ta na mesa pa papia riba e diferencianan cu tin riba mesa aworaki, pa Aruba por yega na remarca pa e sosten di likidez si nos ta haye of no”, e dignatario a señala.
Minister Presidente a puntra: “Kico ta pasa si nos no haya e sosten di likidez aki?”
“Si nos no haya e sosten di likidez pa e cuartal aki nos mester hala faha mara. Nos a cuminza caba, como gobierno. Pesey Minister di Finanzas a emiti e carta cu pa 15 di October, a cuminza caba cu cera e posibilidad pa gastonan adicional di gobierno. Pa mi duna ehemplo, si tin gastonan adicional di viahe no ta posible mas, cu excepcion di cosnan sumamente urgente, of otro tipo di gastonan; tur loke mester wordo postpone ta wordo postpone pasobra si nos no haya sosten di likidez, Gobierno no por sigui haci gastonan.
Esaki no ta conta solamente pa Ministerraad pero e ta conta pa tur e departamentonan di gobierno; claro, nos tin cu mantene tur e servicionan vital pa eseynan si por continua”, Minister Presidente a señala.
E dignatario a referi na loke CAft a duna su opinion y a comparti esaki, den su conferencia di prensa, con Aruba ta bayendo.
“Nan ta haya cu Aruba ta bayendo bon. Nan a duna Aruba hopi elogio pa e maneho cu gobierno ta hibando, specialmente riba e tereno di turismo, pero tambe riba e tereno financiero.
Segun nos calculacionnan pa e aña aki Aruba ta bay mira un crecemento di 13.9% y esaki ta danki na e esfuerzo di cada ciudadano di nos pais, pasobra ora cu e crisis a dal nos, di berdad el a benta nos abao, pero nos cada un a sa di lanta; algun ta mas fuerte para cu otro caba riba nan pia, depende ki sector nos ta papiando di dje. Pero den totalidad nos hunto a percura pa tin un crecemento economico, e aña aki, di casi 14%. Otro paisnan di region no a mira esaki, ni paisnan den Reino tampoco; cerca nan, ta 2%. Cerca nos ta 14%”, Prome Minister a subraya.
Prome Minister a agrega cu por mira cu desempleo a baha na Aruba, y enberdad no tur hende cu a perde trabao y cu a haya FASE tin trabao caba, pero e gran mayoria si. Pues, esaki ta e motibonan pa cual CAft a yega na e conclusion cu Aruba ta bayendo, economicamente tambe, den bon caminda, y cu pesey, segun nan, Aruba no mester di sosten di likidez. Nos ta diferencia di opinion, pasobra nos ta di opinion cu nos si mester di sosten di likidez pa algun gasto, pero manera mi a bisa esey ta algo cu nos ta na mesa cune y nos ta sigui dialoga y delibera ”, e dignatario a bisa.
