FADA a presenta resultado di estudionan riba “vaping” na Aruba
ORANJESTAD (AAN): Dialuna mainta 16 di september Prome Minister Evelyn Wever-Croes hunto cu Ministernan Rocco Tjon, Dangui Oduber y Endy Croes a reuni cu Fundacion Anti Droga Aruba (FADA). FADA ta un organisacion no-gubernamental cu ta existi pa 40 aña caba cu e meta di informa y conscientisa pueblo di Aruba y sigur e hobennan tocante e problemanan cu uzo y abuso di droga y alcohol ta trece cu ne.
Durante e mainta aki representantenan di FADA a trece dilanti e preocupacion cu nan tin pa cu vaping na Aruba. Esaki awendia ta un “trend” cu ta andando entre adultonan y hobennan pero mas preocupante ta cu edad entre e hobennan ta hopi jong, cuminsando na 7 aña. Na Aruba hopi hende no conoce ainda e riesgonan di salud cu ta bin cu vaping y esaki ta e enfoke y e meta di FADA, pa conscientisa e comunidad.
Vaping ta un manera di humamento pero na un manera mas moderno sin cu ta saca huma manera un sigaria. Pa e motibo aki tin e creencia cu vaping ta menos dañino cu sigaria cual no ta cuadra cu berdad. Tin hende ta haci’e como un trend uzando diferente aroma y azetanan esencial cu ta hole y por smaak dushi. Esaki tin varios consecuencia negativo riba salud di un persona. Ta trata di problemanan di pulmon principalmente, pero tambe otro problemanan grave di salud. Y sigur den caso di muchanan cu ya na un edad jong ta haci vaping esaki ta mas grave ya cu ainda nan pulmonnan no ta asina fuerte ni desaroya ainda.
“FADA a presenta na nos e resultado di nan estudio y con nan kier conscientisa comunidad y Gobierno di Aruba ta sostene e iniciativa di FADA totalmente y ta spera cu pronto e por wordo concretisa. Na fin di dia un adulto ta responsabel pa su actonan y di e consecuencianan, pero un mucha no y p’esey ta tarea di e adulto pa duna ehempel y protege nos muchanan. Nos niun kier pa na grandi nos muchanan por tin problemanan di pulmon y otro problemanan di salud. Den nomber di Gobierno di Aruba mi ta gradici FADA pa nan aporte na e comunidad di Aruba durante tur e añanan cu campañanan di conscientisacion”, Prome Minister a expresa.
