ORANJESTAD (AAN): Un grupo cu ta vulnerable den comunidad cu mester haya atencion ta nos grandinan. Cuido di nos grandinan ta un prioridad halto pa Gabinete Wever-Croes.
Pa e motibo aki tambe, Gabinete Wever-Croes II a inclui den e ministerionan un ministerio cu lo encarga specificamente cu nos adultonan mayor. Minister Ursell Arends ta e minister encarga. Di e manera aki, pueblo por ta sigur cu Gobierno lo dedica atencion y e tempo cu mester pa atende cada un di e retonan.
Aruba tin problema di “vergrijzing” cual ta motibo pakico gobierno mester pone mas atencion riba e tema aki.
“Loke nan ta yama ‘vergrijzing’ como un problematica, pa mi e no ta un problema sino mas bien un desaroyo den bida hopi bunita ora cu ciudadanonan yega na un edad halto. Gobierno kier duna mas participacion na tur esnan cu a yega na un edad bunita y cu por y kier contribui na bienestar di nos pais”, Prome Minister Evelyn Wever-Croes a enfatisa.
Na comienso di Gabinete Wever-Croes I, e idea a surgi pa bin cu un comision, Raad van Ouderen pa yuda atende cu e tema y retonan cu nos grandinan tin. Un comision asina lo resorta bou SER cu lo atende cu e temanan aki. Trabaonan preparatorio pa cu esaki a worde haci durante Gabinete Wever-Croes I pero no a worde concretiza ainda. Prome Minister tin confianza cu sr. Ursell Arends lo sa di concretiza esaki pronto den e proximo gobernacion.
Den vision di Gobierno di Aruba, Ouderenraad ta importante y e institucion di esaki pronto lo worde concretisa. Ouderenraad ta e comision di nos grandinan cu lo consisti di personanan cu ya a baha cu pensioen, 60+. E intencion ta pa e Ouderenraad duna Gobierno conseho cu ta na interes di nos grandinan. E comision lo duna conseho na Gobierno sea Gobierno pidi conseho of no.
Gabinete Wever-Croes ta kere den un Ouderenraad cu lo funciona como un instituto consistente cu lo vigila mas di cerca e cuido di nos grandinan y tur loke cu ta importante pa nos ciudadanonan di edad mas grandi, cu na nan turno lo informa Gobierno y tene Gobierno skerpi riba e puntonan aki. Ya pa basta tempo, Gobierno ta buscando e miho formula pa pone den ley, institucionalise pa garantisa cu e ta keda duradero y structural bao di tur gobierno. Di e manera aki tambe ta garantisa cu nos grandinan semper tin un bos den maneho di Gobierno.
Minister Ursell Arends, come e Minister di Asuntonan di Adulto Mayor, lo sigui y ohala cu pronto institui e comision di Ouderenraad pa despues traha e ley y busca hendenan cu lo forma parti di e comision.
Prome Minister a expresa di a desea di tabata por a realiza e vision aki mas prome. E situacion financiero di Aruba cu mester a haya atencion den e prome lunanan di gobernacion y despues sigui pa e pandemia cu a causa mas problema financiero, a pone hopi plan di Gobierno un banda. Aruba, awo por bisa cu nos ta riba e caminda di recuperacion y e vision di Gobierno pa nos adultonan mayor lo worde realisa.
