Gobierno ta basa su maneho di finansa publico riba un maneho financiero sostenibel y sano

ORANJESTAD (AAN): Minister Xiomara Maduro a presenta su plan di Gobernacion 2021- 2025 pa loke ta su carteranan di Finansa y Cultura.

Na comienso di aña 2020 finansa di Pais Aruba tabata bayendo den bon direccion. Na momento cu COVID-19 a presenta, a surgi un crisis di likides cu a debilita e finansa y economia di nos pais.

Pa por enfrenta tur crisis den futuro y logra un pais resiliente, Gobierno ta basa su maneho di finansa publico riba un maneho financiero sostenibel y sano. Alabes ta mantene su maneho financiero den cuadro di palabracionnan di protocol cu Hulanda den 2018 y den ‘Landspakket’. 

FINANSA

Pa trece pais Aruba na un situacion financiero solido, duradero y saludabel, Gobierno lo enfoca riba e siguiente puntonan di accion: 

- Maneho financiero

• Reduci e debenan nacional door di realisa surplus financiero presupuestario continuo den combinacion cu crecemento economico.
• Reduci structuralmente gasto di personal den combinacion cu proyectonan menciona den Landspakket.
• Fortifica y monitorea e control di gastonan pa baha gastonan innecesario.
• Fortifica e columna financiero; analisa e posicion di e Colegio Superior di Estado (Controlaria General, Auditoria y Raad van Advies).
• Stimula uzo di informacion estadistica pa hunga un rol mas eficiente pa substancia maneho. • Ahusta e maneho di subsidio pa bira un mas eficiente y efectivo. • Investiga e maneho di compra di Gobierno pa fortifica e sistema di compra na uno mas efectivo. 

- Sector financiero

• Investiga deficiencia den legislacion pa introduci garantia di deposito. 

- Impuesto

• Continua cu e restructuracion di Reforma Fiscal den su totalidad, pa crea un impuesto mas husto y mas eficiente.
• Move impuesto directo pa indirecto pa: - Amplia e base di cobransa - Mehora e poder di compra
• Optimalisa e sistema/programa di compliance pa mehora e integridad den proceso, amplia aceso y intercambia informacion cu sector financiero.
• Continua cu modernisacion di Departamento di Impuesto (DIMP) pa por brinda un servicio mas eficiente y efectivo. 

CULTURA 

Cultura y arte ta determina e identidad di un persona, un pueblo y un pais. Cultura y arte tin un impacto significativo pa mehora calidad di bida di un pais, diversificacion di su economia y ta contribui na inclusion social y diversidad cultural. Cada persona tin e derecho di conoce su historia y cultura. Cultura mester ta di tur hende y pa tur hende.

 Gobierno tin responsabilidad pa stimula conocemento y desaroyo cultural y arte, alabes preserva nos herencianan cultural inmaterial y material, especial na beneficio di nos futuro generacionnan.

Gobierno tin tambe un rol importante pa stimula participacion activo di nos pueblo na actividadnan cultural y di arte. 

Stimula y promove cultura y arte:

• Maneho y Preservacion

Desaroya un maneho integral di cultura pa un impacto educativo, social y turistico y pa promove nos cultura, historia y identidad.

Ekipa Departamento di Cultura pa ehecuta e maneho integral cultural. Institui un Conseho di Cultura cu e meta primordial pa supervisa e implementacion di e maneho cultural di Aruba.

Introduci leynan necesario pa proteha nos herencia cultural, naturalesa y monumentonan.

Stimula preservacion y exposicion di arte.

Sostene organisacionan no-gubernamental cu ta traha riba formacion artistico di mucha y hoben.

• Educacion

Desaroya un Plan Educacional pa Aruba cu lo enfoca tanto riba e educacion cultural den enseñansa como pafo di enseñansa cu tin como meta pa hobennan cera conoci cu cultura, arte y alabes desaroya nan abilidadnan creativo.

Conscientisa e balor, nificacion y uzo di nos idioma Papiamento. Educa y conscientisa nos pueblo pa balora nos cultura, arte y reconoce nos mes talentonan.

Amplia y intercambia di conocemento cu profesional -organisacion y instancianan cultural den colaboracion cu otro paisnan den Reino y tambe expande lasonan cu instancianan internacional.

• Intercambio cultural

 Fomenta intercambio cultural local, entre islanan ABC y den region.

• Industria Creativo

Ekipa Departamento di Cultura pa contribui na desaroyo di e sector Creativo como un di e sectornan prometedor di Aruba.

Crea oportunidad pa empleo por medio di e Programa di Aruba Outdoor Amenity Economy pa esnan den e ramo di industria creativo manera obra di man, musica, arte culinario, souvenirs etc.

• Fondo
• Crea oportunidad pa haya fondo cultural internacional.