Misha Raymond di RAIZ:
ORANJESTAD (AAN): Misha Raymond di Partido RAIZ a duna di conoce cu nan tabata spera cu e caida di gobierno ta bay sosode mirando cu for di e momento cu nan a indica cu RAIZ lo kier un otro candidato di fraccion di MEP pa nan por sostene pa Presidente di Parlamento, a bisa, teniendo na cuenta e acuerdo di gobernacion cu RAIZ a firma cu MEP, unda cu ta stipula cu MEP lo tin e 'voorzitterschap' den Parlamento.
Raymond a sigui bisa cu democraticamente nan ta pensa cu nan por deposita nan voto den un candidato cu nan ta pensa cu lo por eherce e trabao debidamente.
E ta haya un desaroyo alarmante cu na momento cu democracia reina den sala di Parlamento unda cu democraticamente a scoge pa un voorzitter, cu gobierno mester cay pa esaki. "Un no tin di haber cu otro. Gobierno no ta dicta ken ta sinta riba stul di Parlamento. Parlamento ta dicta ken ta sinta riba e stul aki", a expresa.
Segun Raymond, e atakenan contra su persona a cuminsa pasobra el a haci su trabao y esey ta loke a sosode den sala di Parlamento. A ofrece fraccion di MEP pa bin cu otro candidato y te na ultimo momento nan a laga sa cu nan ta para firme tras di Sr. Vrolijk loke ta nan derecho.
RAIZ a indica for di diadomingo cu si nan no ta haya otro candidato cu nan lo sostene Raymond Kamperveen.
